ट्रम्पाचें ट्रम्पेट

भांगरभूंय | प्रतिनिधी

रत आनी पाकिस्तानां मदल्या झूज बंदी उपरांत 25 वरांनी लश्कराच्या तिनूय दळांनी पत्रकार परिशद घेतली. पाकिस्तानान परत आगळीक केल्यार (ड्रोन सोडप, घुसखोरी करप) तांकां बुद्द शिकयतले, अशें तांणी सांगलां. दुस्मानांचे 100 वयर आतंकवादी मारल्यात, तातूंत कंदहार विमान अपहरण, पुलवामा हल्लो करपी तिगजाण आसात, अशेंय तांणी स्पश्ट केलें. ह्या वेळार पत्रकारांनी जायते प्रस्न विचारले. कितले आतंकवादी मेले, आमचे कितले शहीद जाले, कितल्या थळांचेर हल्लो केल्लो, कराची केन्ना ताब्यांत घेतिल्लें, खंयचीं विमानां, क्षेपणात्रां वापरिल्लीं, राफायल विमान तांणी उडयलां असलें जायतें. पूण तांणी कसलीच म्हायती उक्ती करूंक ना. हाका म्हणटात शिस्त. लश्कराक ती पाळचीच पडटा. उथळपणाक थंय स्थान ना. हे पत्रकार परिशदेक खबरां चॅनलांचेर पत्रकार आशिल्ले. तातूंतल्या कांय चॅनलांनी मात अदमासान खरे, फट दिशाभूल करपी म्हायतीचो हल्लोच केल्लो. जांणी ही पत्रकार परिशद पळयल्या, त्या सामान्य लोकांक निदान आतां तरी कितें उलोवप, बरोवप, शॅर करप, खंयचे गजालीचेर विस्वास दवरप हें कळ्ळां आसतलें. कारण सोशल मिडियाचेर तांचोच वावर चड आसता.
झूज बंदीचें स्रय घेवपाक सगल्यांत पयलीं धांवले ते अमेरिकेचे अध्यक्ष डोनाल्ड ट्रम्प. ‘अमेरिकेन स्वता फुडाकार घेवन हें झूज थांबयलां. दोनूय देशांनी झूज बंदी केल्या, अशें हांव जाहीर करतां. तांणी अक्कल हुशारेन झूज थांबोवपाचो निर्णय घेतला.’ अशा आशयाचें ट्विट तांणी केलें. उपरांत कांय वेळान दोनूय देशांच्या लश्कराच्या सरसंचालकांची उलोवणी जालीं आनी झूज बंदी जाहीर जाली. दोन देशांचें झूज जाता तेन्ना सहसा त्याच देशाचे फुडारी वा लश्करी अधिकारी कितें तो निर्णय घेतात. अर्थांत व्हडले देश तांकां सल्लो दितात. पूण भारतान आतां मेरेन व्हडले निर्णय स्वता घेतल्यात आनी ते योग्यूच थारल्यात. आमी तांचे आडचीं झुजांय जिखल्यांत. बांगलादेश निर्मिती वेळार अमेरिकेन भारताक भेश्टावपाक झुजा बोटूय हाडून दवरिल्ली. मात, प्रधानमंत्री इंदिरा गांधी आनी फिल्डमार्शल सॅम माणेकशाॅ बदले नात. शेनवारा एक ट्विट केले उपरांत आतां ट्रम्प हांणी आनीक एकदां ‘ट्रम्पेट’ वाजयलां. ‘भारत आनी पाकिस्ताना मदलो हजारांनी वर्सां (हीं उतरां ट्रम्पसायबाचींच) हुमकळत आशिल्लो काश्मीर प्रस्न सोडोवपाक अमेरिका वावुरतली. दोनूय देशांनी योग्य तोच निर्णय घेतलो, नाजाल्यार हजारांनी लोक मरपाचे. मालमत्ता नश्ट जावपाची. आमी ह्या दोनूय देशां वांगडा वेपारी संबंद वाडयतले.’ भारतान आतां मेरेन काश्मीर प्रस्नांत मध्यस्थी करपाक कोणाकूच दिवंक ना, मागीर ट्रम्प परस्पर हें उलयले कशे? वेपारी संबंद वाडयतले खंय. म्हणजे ही झूज बंदी लोक मरतले, मालमत्ता नश्ट जातली म्हूण करपाक सांगलीं, (सांगल्या जाल्यार) काय वेपार, शस्त्रास्त्र विक्री वाडोवपाक? हें बरय मेरेन हाचेर आमचे सरकारी यंत्रणेन प्रतिक्रिया दिवंक नाशिल्ली. आमी मध्यस्थी करून झूज बंदी केली आनी काश्मीर प्रस्न सोडोवपाक वावुरतले ह्या वक्तव्यांचेर कोणेतरी उलोवपाक जाय. पाकिस्तानान मात हरकत घेवचे बदला (तशे परिस्थितींत ते नात) अमेरिकेचे उपकार मानल्यात. सौदी आनी चीनाकूय कुर्निसात केला.
चीनान पाकिस्तानाक तेंको दिला. हाचेर आमचे राष्ट्रीय सुरक्षा सल्लागार अजित डोवाल हांणी ‘हल्लो करप हो आमचो स्वताचो पर्याय नाशिल्लो. दुस्मानाचे करणेक लागून तो करचो पडलो’, अशें चीनी विदेश मंत्र्यांक सांगलां. पहेलगामचो खर निशेध करपी चीन 12 दिसां भितर घुंवलो. भारतान जीडीपींत जपानाक फाटीं उडयला. चीनाचें हांगाय लक्ष आसतलें. शेजारी देशांक दुबळो करपाक सोदपी चीनाचेर आमकांय बारीक लक्ष दवरचें पडटलें. श्रीलंका, पाकिस्तान सध्या चीनाच्या हातांतलीं बावलीं जाल्यात. अर्थीक जाळ्यांत दोनूय देश घुस्पल्यात. हो गुंतो सुटपाक बरींच वर्सां वतलीं.
कालचे पत्रकार परिशदेंत भारतीय लश्करान ‘आमी स्वता जावन कांयच करचे नात, पूण देशाची सुरक्षा, सार्वभौमत्व सांबाळपाक मात खरांतली खर जाप दितले’, अशें सांगलां. ह्या हल्ल्यांत शीम आनी नियंत्रण रेशेचेर पाकिस्तानाच्या फारपेटांत आमचे पांच जवान शहीद जाल्यात, तर तांचे चाळिशेक सैनिक मेल्यात. 100 वयर आतंकवादीय सोंपल्यात. ‘आमचें काम लक्ष्याचेर मारो करपाचें, कितें मोडलें, कितले लोक मेले तें पळोवपाचें न्हय. आमी आतंकवाद्यांच्या अड्ड्यांचेरुच हल्लो केला,’ अशें भारतीय लश्करान म्हणलां. झूज बंदी करपाची विनवणी पयलीं पाकिस्तानाच्या लश्करी सरसंचालकान केल्ली, अशेंय एअरमार्शल भारतीन सांगलें. पयरचे घडणुके उपरांत आयतारा सांजवेळ मेरेन तरी पाकिस्तानान मस्तेपणा करूंक नात. केल्यार ताका तें म्हारग पडटले, हें लश्करी पत्रकार परिशदे वयल्यान जाणवलें. काश्मीर, राजस्थान, पंजाब, जम्मूंत आयज परिस्थिती सामान्य आशिल्ली. बाजारुय उक्तो आशिल्लो. परिस्थिती निवळटा. ते कितेंय आसलें तरीय पहलगामच्या त्या आतंकवाद्यांक पयलीं सोदून काडपाक जाय.
कोणेच वावड्यो पातळावच्यो न्हय, अशें लश्करान म्हणलां. ताका पाळो दिवप हें प्रत्येक राष्ट्रवादी भारतीयाचें कर्तव्य. हें खास करून खबरां चॅनलांक सांगलां आसतलें आनी सोशल मिडिया ग्रॅज्युएटांकूय!!