टोयोटा संवसारांतली सगळ्यांत चड कार विकपी कंपनी

भांगरभूंय | प्रतिनिधी

नवी दिल्ली, खबरां संस्था ः टोयोटा मोटर कॉर्पोरेशन ही 2023 वर्सा संवसारांतली सगळ्यांत चड कार विकपी कंपनी थारली. ह्या काळांत कंपनीन संवसारभर 1.15 कोटी गाडयो विकल्यो. टोयोटान जर्मन कार कंपनी फोक्सवॅगन कंपनीक सेगीत चवथ्या वर्सा फाटीं घाल्या. विक्रीचे नदरेन दुसरें सुवातेर आशिल्ल्या फोक्सवॅगन कंपनीन वर्सुकी 12% वाड करुन 92.4 लाख गाडयो विकल्यो.

कंपनीचें उत्पादनूय वाडलें
ब्लूमबर्गच्या अहवाला प्रमाण, कंपनीचे विक्रींत तिच्यो उपकंपनी Daihatsu आनी Hino हांचोय आस्पाव आशिल्लो. 2022 वर्साच्या तुळेंत टोयोटाची वाहन विक्री 7.2 टक्क्यांनी वाडल्या.
हाचे वांगडाच 2023 वर्सा टोयोटाचें उत्पादन 2022 वर्साच्या तुळेंत 8.6 टक्क्यांनी वाडून 1.15 कोटी जालें. उत्तर अमेरिकेंत आनी युरोप सारक्या बाजारांत स्थिर मागणी वांगडाच पुरवण साखळींत सुदारणा जाल्ल्यान टोयोटाची विक्री वाडपाक मजत जाल्या.

हायब्रीड मॉडेलांक लागून विक्री वाडली…
संवसारीक बाजारांत इलेक्ट्रीक गाडयांची मागणी वाडत आशिल्ल्या काळांत ही विक्रीची कामगिरी जाल्या. संवसारांतली सगळ्यांत व्हडली गाडयो विकपी कंपनी टोयोटा इलेक्ट्रीक वाहनां विक्रींत खूब फाटीं आसा. फाटल्या वर्सा फकत 1.04 लाख इलेक्ट्रीक वाहनां खपलीं.
टोयोटाच्या विक्रींत हायब्रिड मॉडेलांचो सगळ्यांत चड वांटो आसा. इलेक्ट्रीक आनी हायब्रिड कार विक्रींत बीवायडी 30.2 लाखां सयत मुखार आसा. तांचे उपरांत 2023 वर्सा 18.1 लाख ईव्ही विक्री सयत टेस्ला कंपनी आसा.