भांगरभूंय | प्रतिनिधी
भाजयेच्या दरांत दुपेट वाड, पावसात कळाव जाल्ल्याचो परिणाम
पणजी : पावसाक कळाव जाल्ल्यान भाजीपाल्याच्या दरांत वाड जाल्ल्यांचे दिश्टी पडटा. उक्त्या बाजारांत टोमॅटोच्या दरांत वाड जाला. हेर भाजयेचेय दर दुपेटीन वाडिल्ल्यान सामान्य मनशाक त्रास जाला.
गोंयांत चडशी भाजी पुरवण कर्नाटकांतल्या बेळगांवांतल्यान जाता. पूण, अंदूं गोंय, कर्नाटक सयत देशांतल्या जायत्या राज्यांनी पावस उसरां आयलो. जूनाच्या पयल्या पंदरा दिसांनी गीम सुरू आसा, अशें दिसतालें. ह्या काळांत शेतकारांच्या पिकांक व्हड लुकसाण जालां. ताकाच लागून भाजयेचो दर दुपेटीन वाडला अशें पणजी बाजारांतली भाजी विकपी माला देसाय हांणी सांगलें.
बेळगांवांतल्यान सगळ्यो भाजयो चड दरान राज्यांत येतात. तातूंत साबार भाजयेचो उणाव आसा. हाचो परिणाम भाजयेच्या दरांचेर जाला अशें देसाय हांणी सांगलें.
मजगतीं, जून म्हयन्याच्या दुसऱ्या अर्दात घोंग्याच्या वादळी पावसाक लागून शेतकारांच्या भाजयेचेंय लुकसाण जालां. ताका लागून भाजयेचे दर दुप्पट, तिप्पट जाल्यात. कोथमिरेची विक्री उक्त्या बाजारांत दर युनिटाक 40 ते 50 रुपया दरान सुरू आसा. घडये चवथ मेरेन अंदूं भाजयेचे दर वाडिल्लेच उरतले अशें दिसता. ताका लागून लोकांच्या बोल्साक खार पडपाची शक्यताय आसा. गोंय बागायतदार म्हामंडळाच्या दुकानांनी उणे दर आसात. पूण थंय लेगीत भाजयेचो उणाव आशिल्ल्यान चडशा नागरिकांक उक्त्या बाजारपेठेचेर आदारून रावचें पडटा.
भाजयेचे दर (किला फाटल्यान)
भाजी उक्तो बाजार बागायतदार
टोमाटो – 80 ते 100 – 52
कांदो – 30 ते 40 – 21
बटाट – 40 ते 50 – 25
भेंडो – 60 ते 80 – 26
कोबी – 40 – 19
वांयगीं – 60 ते 80 – 26
डब्बू मिरसांग – 100 ते 120 – 42
हरवी मिरसांग – 100 ते 120 – 78
कारातीं – 80 – 50
आलें – 250 ते 400 – 16
वाली – 70 ते 80 – 55
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
