भांगरभूंय | प्रतिनिधी
इफ्फीची सांगता : फिलीप नायसाचो जिणे गौरव भोवमान
भांगरभूंय । प्रतिनिधी
पणजीः 55 व्या आंतरराष्ट्रीय चित्रपट महोत्सवांत (इफ्फी) प्रतिश्ठेचो भांगरा मोर साऊले बिलूविएट हाणें दिग्दर्शीत केल्ल्या ‛टॉक्सीक’ ह्या लिथुवानियाच्या चित्रपटान भांगरा मोर मेळयलो. जाल्यार अंदूंचें ‘आयसीएफटी-युनेस्को गांधी’ पदक लेवान अकीन दिग्दर्शीत ‘क्रॉसींग’ ह्या चित्रपटाक फावो जालें. सर्वोत्कृश्ट वेब सिरीज (ओटीटी) पुरस्कार लंपनया सिरीजान जिखलो. बिरेस्तारा इफ्फीचो समारोप सुवाळो बांबोळीच्या डॉ. श्यामाप्रसाद मुखर्जी स्टेडियमाचेर जालो.
ह्या वेळार मुख्यमंत्री डॉ. प्रमोद सावंत, इफ्फीचे संचालक शेखर कपूर, केंद्रीय म्हायती आनी प्रसारण खात्याचे सचीव संजय जाझू, अभिनेत्री रश्मिका मंदाना, अभिनेत्री श्रीया सरन, अभिनेतो विक्रांत मॅस्सी, दिग्दर्शक आशुतोष गोवारीकर, दिग्दर्शक रमेश सिप्पी, अभिनेत्री जयाप्रदा हांचे सयत चित्रपट मळा वयले हेर कलाकार उपस्थीत आशिल्ले.
ऑस्ट्रेलियन दिग्दर्शक फिलीप नायस हांकां ह्या वेळार सत्यजीत रे जिणे गौरव पुरस्कारान भोवमानीत केले. कार्यावळीचें सुत्रसंचालन समीर कोचर हांणी केलें. अरमान मलीक, मामे खान हांणी आपल्या संगितान प्रेक्षकांक रिझयले.
मुख्यमंत्री डॉ. सावंत हांणी सांगलें, फाटल्या कांय वर्सांत इफ्फी म्हणल्यार गोंय अशें समिकरण तयार जालां. इफ्फीक लागून गोंय परतून एकदां संवसारीक पांवड्यार पावलां. इप्फी खातीर खूबशे विदेशी पर्यटक नोव्हेंबरांत गोंयांत येतात. इफ्फीक लागून गोंयांत मुळाव्यो सुविधा निर्माण करपाक मजत जाली. थळावे चित्रपट निर्माते गोंयांत शुटींग करपाक प्राधान्य दितात. विदेशी चित्रपट निर्मात्यांनी लेगीत गोंयांत येवन शुटींग करची. गोंय सरकारा वतीन सिंगल विंडो सयत हेर सुविधा दितले. शुटींगे खातीर कसलोच त्रास करिनासतना सगळे परवाने वेळा भितर दितले, अशें मुख्यमंत्र्यान सांगलें.
अंदूं सर्वोत्कृश्ट भारतीय चित्रपट व्यक्तीमत्व म्हूण विक्रांत मॅस्सी हांचो भोवमान केलो. ह्या वेळार तांणी तरणाट्यांक हार मानची न्हय, असो सल्लो दिलो. तांणी सांगलें, हे आदीं आपणे एक चित्रपट रसीक म्हूण इफ्फीक आयिल्लों. आयज हे माचयेर आपलो भोवमान जाता ही आपले खातीर व्हड गजाल. चित्रपट मळार येवपाक सोदपी तरणाट्यांनी स्वताक सेगीत रिस्टार्ट करपाक जाय. संकश्टां आयलीं म्हूण रावचें न्हय. कश्ट करीत रावल्यार योग्य वेळार तुमकां संद मेळटा.
‘शोले’च्या येसाचें खरें स्रय प्रेक्षकांकः सिप्पी
शोले चित्रपटाचे दिग्दर्शक रमेश सिप्पी हांचोय ह्या वेळार भोवमान केलो. तांणी सांगलें, शोले चित्रपट तयार करतना तो इतलो हीट जातलो ही अपेक्षा नाशिल्ली. चित्रपटाची पटकथा, कलाकार बरे आशिल्ले. मात ‘शोले’च्या येसाचें खरें स्रय प्रेक्षकांक वता. तांचें आपूण मना काळजांतल्यान उपकार मानता. तरण्या दिग्दर्शकांनी मन लावन काम करचें. तांकां उरिल्लें येस प्रेक्षकूच दितले.
‘सामी सामी’ गिताचेर नाचली रश्मिका
समारोप सुवाळ्यांत अभिनेत्री रश्मिका मंदाना हिणें ‘पुष्पा’ चित्रपटांतलो संवाद तेलगू भाशेंत उलोवन दाखयलो. ते उपरांत तिणें ‘सामी सामी’ गिताचेर नाच केलो. ताका हाजीर आशिल्ल्या प्रेक्षकांनी उत्स्फूर्त दाद दिली.
इफ्फींतले जैतवंत
– सर्वोत्कृश्ट चित्रपट: टॉक्सीक, लिथूवानिया.
– उत्कृश्ट दिग्दर्शक: बोगदान मुरेशान (दी न्यू इयर दॅट नेव्हर केम)
– उत्कृश्ट अभिनेता: क्लेमेंट फावेयु (हॉली काऊ)
-उत्कृश्ट अभिनेत्री: वेस्ता एम आनी लेवा आर (टॉक्सीक)
-विशेश जुरी : लुईस कोर्सव्हेसेअर (हॉली काऊ)
-उत्कृश्ट पदार्पण भारतीय दिग्दर्शक : नवज्योत बांदिवडेकर (घरत गणपती)
-उत्कृश्ट पदार्पण दिग्दर्शक : सारा फ्रिडलांड (फॅमिलीयर टच)
– आयसीएफटी – युनेस्को गांधी पदक : क्रॉसिंग – सर्वोत्कृश्ट वेब सिरीज (ओटीटी) : लंपन
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
