भांगरभूंय | प्रतिनिधी
डॉ. स्नेहा पोकळेः 70.2 टक्के कॉल 18 ते 45 पिराय गटांतले
भांगरभूंय । पिनाक कल्लोळी
पणजीः मानसीक भलायकी बरी उरची हे खातीर राज्य सरकारान सुरू केल्ल्या टेली मानस हेल्प लायन सेवेक सगळ्यात चड कॉल 70.2 टक्के कॉल हे 18 ते 45 पिराय गटांतल्या मनशांचे आसात. वट्ट कॉलांतले सगळ्यांत चड 31.10 टक्के कॉल कामाचे सुवाते वयल्यो समस्या, मूड पेड्डेर आसप, सेगीत पुरो जावप, दिसपट्ट्या कामांतली आवड उणी जावप ह्या आनी हेर समस्या खातीर आयिल्ल्याची म्हायती टेली मानस विभागाच्या वरिश्ठ मानसोपचारतज्ञ सल्लागार डॉ. स्नेहा पोकळे हांणी दिली.
मेळिल्ले म्हायती प्रमाण गोंयांत 15 मे 2023 ते 31 मे 2024 ह्या काळांत हे सेवेक 6,106 कॉल आयले. तातूंतले सुमार 201 कॉल हे 12 वर्सां पिराय गटांतल्या भुरग्यांचे आशिल्ले. 13 ते 17 पिराय गटांतल्यान 671, 18 ते 45 पिराय गटांतल्यान 4,286, 46 ते 64 पिराय गटांतले 744 जाल्यार 65 पिराये वयल्या व्यक्तीं कडल्यान 201 कॉल आयल्यात. कॉल केल्ल्या चडश्या जाणांक फोना वयल्यान समुपदेशन केलें. जाल्यार चड गरज आशिल्ल्यांक प्रत्यक्ष मेळून समुपदेशन केलें.
जिणे शैलींत बदल, त्रासदिण्या अणभवाक लागून आयिल्लो तणाव, अर्थीक समस्या, गंभीर दुयेंस, सुमारा भायर सोपो पियेवप, स्वता विशीं दुबाव आसप, आत्मसन्मान उणो आसप, करियर वेंचपाक गोंदळ आसप, विद्यार्थ्याची शाळेंत हेर विद्यार्थ्यां कडल्यान जावपी सतवणूक, कामाचो आनी परिक्षेचो ताण ह्या कारणां खातीर सगळ्यांत चड कॉल आयिल्ले. नाते संबंदांतल्या कागाळीं खातीर 14.32 टक्के कॉल आयिल्ले. तातूंत पालक, घरांतले वांगडी, इश्ट, घोव- बायलेच्या नात्यांतल्यो समस्या, शारिरीक संबंदांतल्यो समस्या हांचो आस्पाव आसा. तेच प्रमाण हुस्को वा ऑब्सेसिव्ह-कंपल्सिव्ह डिसऑर्डर हे खातीर सुमार 13.17 टक्के कॉल आयिल्ले. तातूंत वेसन, ल्हानपणांतलो दुखदिणो अणभव, अती शिस्तीचें पाकलत्व, गंभीर दुयेंस, सिलेक्टीव्ह म्युटीझम अश्या समस्यांचो आस्पाव आसा. जाल्यार वैवाहीक, कुटुंबीक वा हेर व्यक्तीं वांगडा आशिल्ल्या समस्यां खातीर 10.23 टक्के कॉल आयिल्ले. परिक्षा/ अभ्यासा संबंदांतल्या हुस्क्यांतल्यान 6.33 टक्के कॉल आयिल्ले.
गोंयांत मानसीक समुपदेशन घेवचे खातीर टेली मानस ही सेवा फायद्याची थारता. लोक आपल्या मानसीक समस्या लिपोवन दवरिनासतना कॉल करून मजत घेतात, ही बरी गजाल. हे हेल्प लायनी विशीं आमी खात्या वतीन चडांत चड जागृती करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
