भांगरभूंय | प्रतिनिधी
पॅरीस, खबरां संस्था: टेलिग्राम मेसेजिंग ॲपाचे संस्थापक आनी सीईओ पावेल दुरोव्ह हांकां शेनवारा पॅरिसा लागसारच्या बोर्गेट विमानतळार अटक केल्या. फ्रांसांतल्या प्रसार माध्यमांनी दिल्ले खबरे प्रमाण, दुरोव्ह आपल्या खाजगी विमानांतल्यान फ्रान्सांत पावले तेन्ना पुलिसांनी अटक वॉरंट जारी करून तांकां ताब्यांत घेतले. टेलिग्रामांत कंटेंट मोडरेटरचो उणाव आशिल्ल्याची चवकशी फ्रेंच पुलिसांनी सुरू केल्या. पुलिसांनी दिल्ले म्हायती प्रमाण मॉडरेटराचो उणाव आशिल्ल्याठ टेलिग्रामाचेर गुन्यांवकारी वावर वाडल्यात.
मजगतीं, टेलिग्रामान हे विशीं अजून कसलोच प्रतिसाद दिवंक ना. फ्रान्साच्या आंतराश्ट्रीय वेव्हार मंत्रालयान आनी पुलिसांनीय अधिकृतपणान कसलीच टिप्पणी करूंक ना. पूण रशियेच्या परराश्ट्र मंत्रालयान हे अटकेचेर प्रस्नचिन्न उबें करून अटक करपाचीं कारणां उक्तीं करपाची मागणी केल्या. तशेंच अस्तंत देशांतल्या स्वयंसेवी संघटनांनी दुरोव्हाची सुटका करपा खातीर यत्न करचे असो उलो मारला.
पावेल दुरोव्ह कोण?
३९ वर्सां पिरायेचो पावेल दुरोव्ह हाचो जल्म रशियेंत जालो. ताणें २०१३ वर्सा टेलिग्रामाची थापणूक केली. गुप्तताय, एनक्रिप्शन आनी अभिव्यक्ती स्वातंत्र्याच्या पुरस्काराक लागून टेलेग्रामाक रोखडीच लोकप्रियता मेळ्ळी.
दुरोव्हाक २०१४ वर्सा रशिया सोडचें पडिल्लें. टेलिग्रामाचेर विरोधकांचें खातें काडून उडोवपाची मागणी केल्या उपरांत दुरोव्हान निशेध केलो. तांणी २०१७ वर्सा दुबयंत रावपाक सुरवात केली आनी २०२१ वर्सा फ्रेंच नागरीकत्व घेतलें.
टेलिग्राम संबंदीत वाद
टेलिग्राम सुरू जाले उपरांत संवसारभरांतल्या जायत्या सरकारांनी ह्या ॲपाचेर नियंत्रण दवरपा खातीर चेंपण हाडलें. पूण दुरोव्ह हांणी विवीध देशांच्या सरकारांच्या चेंपणा कडेन आडनदर केली. ताका लागून अभिव्यक्ती स्वातंत्र्याचो पुरस्कर्तो म्हूण ताची प्रतिमा निर्माण जाली. मजगतीं फाटल्या कांय वर्सां सावन टेलिग्रामाचो गुन्यांवकारी वापर करपाक लागिल्ल्याचो आरोप आसा. टेलिग्रामाच्या एनक्रिप्शनांत घुस्पागोंदळ करून कट्टरपंथी आनी गुन्यांवकार बेकायदेशीर वावर करतात. देखून युरोपी देश खासा करून फ्रांस टेलिग्रामाच्या मॉडरेशन धोरणाचेर टिका करपाक लागल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
