टेबल टेनिस खेळांत करियर

भांगरभूंय | प्रतिनिधी

टे बल टेनिस खेळ एका काळार लोकप्रीय आसलो. सगल्यात ह्या खेळा विशीं म्हायती आसा, पूण ते तो खेळटाच अशें ना. ल्हान लाकडाचें बॅट आनी पोकळ धवो बाॅल हांच्या साह्यान दोगजाण वा चवग खेळगडे तो खेळटात. इंग्लंडांत व्हिक्टोरियन काळांत हो खेळ फक्त मनोरंजना खातीर सुरू केल्लो. मात आतां आॅलिंपीक पांवड्याचेर पावला. आतां त्या पांवड्या वयली सर्त गोयांत जावपाची आसा. ती 5 ते 7 सप्टेंबर मेरेन मोरजेच्या अरालिया बीच रिसोर्टांत जातली. शी पेडलर्स महिला आंतरराष्ट्रीय टेबल टेनिस सर्त अशें तिचें नांव.
त्या वेळार एक खाशेलें पुस्तकूय भायर सरतलें. ही सर्त बायलां खातीर आसा. स्मेश हर स्टोरिज अशें पुस्तकाचें नांव. तातूंत 1947 ते 2024 मेरेनच्या बायल खेळगड्यांचो नियाळ घेतला. जो सगल्यांकूच प्रेरणा दिवपी आसा. 32 बायल टेबल टेनिस बायल खेळगड्यांची तातूंत म्हायती आसा. हें पुस्तक शमिक चक्रवर्ती, दिलीप प्रेमचंद्रन हांणी खेळां इतिहासकार बोरिया मुजुमदार हाच्या मार्गदर्शना खाला बरयलां. बंगालाची मुनमुन मुखर्जी, दीप जैन, तीन फावट राष्ट्रीय वस्ताद आशिल्ली महाराष्ट्राची शिल्पा जोशी हांची म्हायती भितर आसा. हे सर्ती खातीर कमलेश मेहता (अर्जुन पुरस्कार जैतिवंत), अभिनेत्री पूजा बेदी, साईची डाॅ. गीता नागवेंकार, उद्देगपती नीरज बजाज, गोंय टेबल टेनिस संघटनेचे अधिकारी हाजीर आसतले.
आयज लेगीत टेबल टेनिस खेळपी राष्ट्रीय पांवड्या वयलीं नांवां पळयल्यार तातूंत गोंयचीं नांवां खूब उणीं आसात. हो खेळ तुमकां तंदुरुस्त दवरता. हाचें उदाहरण म्हूण शैलजा साळोखे नाजाल्यार 80 वर्सां पिरायेची ट्रेकर रंजना पत्की हांचे कडेन पळोवं येता.
गोंयांत हो खेळ रुजचो, म्हूण गोंय टेनिस संघटनेचे दीपक गोपानी आनी संदीप हेबळे हांचे विशेश यत्न चालू आसात. दीपक हांणी तर आपले घरकान्नीक हो खेळ शिकोवन तिका सर्ती खातीर तयार केल्या. गोंयांत राज्य पांवड्याचेर टेबल टेनिस खेळपी जायते खेळगड्यो बायलो आसात. आतां राष्ट्रीय पांवड्याचेर नांव करपाक तांणी वावुरपाक जाय. ह्या खेळान इतली उदरगत केल्या की आॅलिंपिक्स सर्तींचो आसपाव आसा. जायत्यो सर्ती देश, विदेशांत जाता. आतां गोंयांत जावपाची आसा, ती खास बायलां खातीरची सर्त. तातूंत वांटेकार जावपाक देशांतल्यो आनी विदेशांतल्यो खेळगडी येवपाच्यो आसात. निवृत्त आयकर अधिकारी शिल्पा जोशी टाकळकर, बंगालाची मुनमुन मुखर्जी, मंटू मुरमुर, रिता जैन, मंगल सराफ हे खेळगडी वांटो घेतले. गोंयकार खेळगड्यांनी हे सर्तीचो आनंद घेवपाक जाय. जांकां ह्या खेळांत करियर करपाचें आसा, तांणी तर मुजरत ही सर्त पळोवपाक जाय. दुसऱ्या खेळगड्यांचे खेळ पळोवन नवोदितांक प्रेरणा घेवपाक मेळटा.
दोन- तीन खेळ सोडल्यार करियराचे नदरेन कोण विचार करीनात. कारण अर्थीक नदरेन ते खेळ फायदेशीर नात. एखाद्या खेळांत करियर कर अशें सांगपाक सोंपें पुण मुखार कितें? आयच्या म्हारगायेच्या काळांत हो प्रस्न सगल्यांकूच पडि्लो आसता.
तुमकां जर टेबल टेनिसांत करियर करपाचें आसा, जाल्यार ल्हान पिरायेचेर सुरवात करपाक जाय. पयलींच जर पुरस्कर्तो मेळ्ळो जाल्यार खेळा वांगडा अभ्यासाचेर लेगीत लक्ष केंद्रीत करपाक शकतात. शिल्पा जोशी हांचे शालेय कारकि‍र्दींत टेबल टेनिस खेळप्यांक नवो बाॅल हाडचो पडटालो. थंय एक नेम केल्लो, जिखलो काय तुमकां बाॅल मेळटालो आनी खेळपाक जो नवो खेळगडी येतालो, ताका बाॅल हाडचो पडटलो. जोशीक जिखपाची संवय तेन्ना सावन लागल्या आसतली. दुसऱ्या एका नेमान तिका परिक्षेचे जे गुण आसा, ते मेळप कठीण जातालें. तिच्या सुदैवान क्रिकेटर संदीप पाटील तिचे मजतीक आयलो आनी हो नेमूय भायर पडलो. आमच्या देशांत अशी पद्दत आसा, की तुमी जर येसस्वी जाले तरुच सगले मुखार येतात, तुमचे खातीर वावुरतात. मात सुरवातेक जे कश्ट, सराव आसता, तेन्ना कोण फुडें येनात. उगवत्या सुर्याक नमस्कार म्हणटात तो होच. पुरस्कर्त्यांनी सुरवाते सावन खेळगड्यांक मजत करपाक जाय.
कांय खेळांनी अब्जांनी रुपया आसात. क्रिकेट हें एक उदाहरण. बीसीसीआय खेळां संघटना संवसारांत सगल्यात गिरेस्त. तांचें फुडारपण वशिलेबाजीक लागून राजकी लोकांक वा तांच्या भुरग्यांक मेळटा. तें खेळगड्यांक दिवपाक जाय. टेबल टेनिस खेळाक व्हडलें मैदान लागना. बंदिस्त जाग्यांत वर्साचे बाराय म्हयने तुमी तो खेळपाक शकतात. ताका पावस, गर्मी कांय लागना. पावसाक लागून मॅच बंद जाली, अशें कांय जाना. संवसार बदलत आसा, आतां बायलांक आपणाक जाय तो खेळ खेळपाक मेळटा. पयलीं सारकीं बंधना नात.
स्वता खेळगडी आशिल्ली शिल्पा जोशी सांगतात, म्हज्या घरांत म्हाका बापायन हो खेळ खेळचो म्हूण मुद्दाम धाडिल्लें. शैलजा साळोखे, रंजना पत्की ह्यो भयणी. शैलजा ही महाराष्ट्रांतली पयली टेनिस वस्ताद, तर रंजना ही बरेपैकी ट्रेनर. तीं म्हणटात, आमी अजूनय फीट आसात. ताचें गुपीत म्हणल्यार हो टेबल टेनिस खेळ. अर्थांत ह्या खेळांत कोणूय करियर करूं शकता,