भांगरभूंय | प्रतिनिधी
हालींच्या तरणाट्यां मदीं कुडींचेर टॅटू काडपाची बरीच क्रेझ आसा. उत्तर प्रदेशांतल्या वाराणसी जिल्ह्यांत टॅटू काडले उपरांत 26 जाणांक एच.आय.व्ही ची लागण जाल्ल्याचो अदमास उक्तायला. केस स्टडी आनी फाटल्या इतिहासाचेर आदारीत, टॅटू काडल्या उपरांत एच.आय.व्ही. ची लागण जावपाची शक्यताय आसात. कारण एकेच सुयेन परत परत टॅटू काडल्यार संसर्ग जावपाचो धोको आसता. मजगतीं, सवाय भितर टॅटू काडून दिवपी दुकानांनी आनी गर्दीच्या सुवातेर टॅटू काडप टाळप असो सल्लो दोतोरांच्या पंगडांनी दिला.
डॉ. प्रीती अग्रवाल हांणी म्हणलें, एचआयव्हीची लागण जावपाचे तीन मुखेल कारणां आसात लैंगिक संबंद, संसर्गजन्य रगत घालप आनी एकाच सुयेंतल्यान वा सिरिंजांतल्यान वखदां घेवप. पूण 26 जाणांनी समुपदेशना वेळार सांगलें की आमी ह्या तीन कारणां पसून पयस आसात. उपरांत दोतोराचें लक्ष तांच्या आंगाचेर आशिल्ल्या टॅटूचेर गेलें तेन्ना दोतोरांनी टॅटू काडल्या उपरांत एचआयव्हीची लागण जावपाची शक्यताय आसा असो अदमास काडलो.
दोतोरांच्या म्हणण्या प्रमाण, टॅटू काडपी लोक चुकीच्यो सुयो वापरतात. टॅटू खातीर वापरिल्ले सुयेचें मोल दर सुयेक 1200 रुपया आसता. अशें आसून लेगीत कांय दुकानांनी 200 रुपयांक टॅटू काडून दितात. हाचो अर्थ ताचो भलायकेचेर परिणाम जाता. परत परत एकूच सुय वापरप हें लागण जावपाचें मुखेल कारणूय आसूं येता.
दरेका जिल्ह्यांतल्या सरकारी हॉस्पिटलांनी भलायकी खात्या वरवीं एआरटी केंद्रां चलयतात. हांगा एच.आय.व्ही.ची लागण जाल्ल्या लोकांची नोंदणी करतात, उपरांत गरजेच्यो चांचण्यो आनी उपचाराची वेवस्था करतात. 10 जिल्ह्यांतल्या एआरटी केंद्रांची तपासणी वेळार लागण जाल्ल्या लोकांचो आंकडो वाडिल्ल्याचें दिसून आयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
