भांगरभूंय | प्रतिनिधी
टॅक्सी वेवसायिकांचो निश्चेव; सरकारान लागू केल्ल्या 144 कलमाची दखल घेवपाची न्यायालया कडेन मागणी
भांगरभूंय । प्रतिनिधी
पेडणें: मोपाच्या मनोहर आंतरराष्ट्रीय विमानतळाचेर यलो ब्लॅक टॅक्सी स्टॅण्ड जे मेरेन मेळना ते मेरेन धरणें आंदोलन चालूच उरतलें. सरकारान 144 कलम लावन आमचो आवाज चेंपपाचो यत्न केला. सरकारान पेडणें शारांत जरी 144 कलम लायलें तरी ताका आमी भियेवचे नात. उच्च न्यायालयान सरकारान लायिल्ल्या 144 कलमाची दखल घेवची आनी आमकां न्याय दिवचो, अशी मागणी आंदोलन करप्यांनी केल्या.
मनोहर आंतरराष्ट्रीय विमानतळाचेर हक्काचो यलो ब्लॅक टॅक्सी स्टॅण्ड वा ब्ल्यू टॅक्सी स्टॅण्ड मेळचो हे खातीर फाटल्या पांच म्हयन्यां सावन आंदोलन चळवळ टुगेदर मोपा इंटरनॅशनल टॅक्सी असोसिएशन संघटणेन सुरू केल्या. ताचोच एक भाग म्हूण 1 मे ह्या दिसा धरणें आंदोलन करतना नागझर वाठारांत सरकाराक 24 वरांची मुजत दिवन जर सरकारान मागणी मान्य केली ना जाल्यार मोपा विमानतळाचेर वचपी सगळ्यो गाडयो आडोवपाची शिटकावणी दिल्ली. ताची गंभीर दखल घेवन सरकारान आदले सांजेर 144 कलम लागू करून आंदोलन चिड्डुपाचो सरकारान यत्न केला, अशें आंदोलकांचें म्हणणें आसा.
ममोहर आंतरराष्ट्रीय विमानतळा खातीर पेडणें म्हालांतल्या वट्ट पांच पंचायत वाठारांतली 90 लाख चौखण मिटर जमीन दिल्या. त्या पिडेस्त शेतकारांक आयज मेरेन न्याय मेळूंक ना. ते भायर थळाव्यांक ह्या प्रकल्पांत टॅक्सी वेवसाय मेळचो, हे खातीर जानेवारी सावन टॅक्सी वेवसायीक सरकारा कडेन मागणी करतात. पूण सरकारान तांचे मागणे कडेन आयज मेरेन आडनदर केल्या.
गोवा फॉरवर्डचे फुडारी तशेंच आदले जिल्हो पंचायत वांगडी दीपक कळंगूटकार हांणी आंदोलन करप्यांक तेंको दिला. टॅक्सी वेवसायीक आपल्या हक्का खातीर लोकशाय मार्गान आंदोलन करतात, पूण सरकारान 144 कलम लावन आंदोलन बंद उडोवपाचो यत्न केला. मोपा विमानतळ जावचो हे खातीर 16 वर्सां आदीं पेडणेंकार रस्त्याचेर देंविल्ले आतां आपल्या हक्का खातीर रस्त्याचेर देंवल्यात. सरकारान तांची मागणी ताकतिकेन पुराय करची, अशी मागणी कळंगूटकार हांणी केली. 114 कलम लावन हें आंदोलन बंद जावचें ना, तें वाडत वतलें, अशीय शिटकावणी तांणी दिली.
अॅड. जितेंद्र गांवकार हांणी सांगलें, फाटल्या चार म्हयन्यां सावन यलो ब्लॅक टॅक्सी स्टॅण्ड मेळचो हे खातीर आंदोलन सुरू केलां. मुख्यमंत्री डॉ. प्रमोद सावंत आनी आमदार प्रवीण आर्लेकार हांचे कडेन खूब बसका जाल्यात. पूण आयज मेरेन टॅक्सी स्टॅण्डा खातीर कसलीच अधिसुचोवणी येवंक ना. मुख्यमंत्र्यांनी आमचे सोशिकसाणीचो अंत पळोवचो न्हय. घडये कसलोय वायट प्रकार घडलो जाल्यार ताची पुराय जापसालदारकी मुख्यमंत्री डॉ. सावंत, पर्यटन मंत्री रोहन खंवटे आनी येरादारी मंत्री मॉवीन गुदिन्हो तशेंच थळावे आमदार प्रवीण आर्लेकार हांची आसतली, अशी शिटकावणी तांणी दिली. ह्या वेळार अॅड. शैलेंद्र गांवस, चेतन कामत, रमाकांत तुळसकार, भास्कर नारुलकार आनी हेरांनी आपले विचार मांडटना आंदोलन करप्यांक पुराय तेंको उक्तायलो.
फक्त 10 दिसांची प्रक्रियाः अॅड. प्रसाद शहापूरकार
हक्काचो टॅक्सी स्टॅण्ड अधिसुचीत करपाची प्रक्रिया करपाक फक्त 10 दीस लागतात. पूण सरकारान 144 कलम लावन जमाव करपाक बंदी घातल्या. ताका लागून लोकांक आपले प्रस्न, आपले अधिकार एकठांय येवन वेवस्थीत तरेन मांडपाक मेळचे ना. जर आपले प्रस्न सुटावे जायनात जाल्यार तांणी रस्त्याचेर कित्याक देंवचें न्हय, असो प्रस्न अॅड. प्रसाद शहापूरकार हांणी उपस्थीत केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
