भांगरभूंय | प्रतिनिधी
आमदार आंतोनियो वास : सदांच टॅक्सीकारां वांगडा रावपाची हमी
भांगरभूंय । प्रतिनिधी
वास्को : कुठ्ठाळी मतदारसंघांतले तशेंच गोंयांतल्या टॅक्सी वेवसायिकांनी सोमारा 2 मेक सकाळीं कुठ्ठाळीचे आमदार आंतोनियो वास हांची भेट घेवन तांचे मुखार टॅक्सी अॅग्रिगेटर मार्गदर्शक 2025 संबंदांतल्यो समस्या मांडल्यो. आमदार वास हांणी सांगलें, आपूण तुमच्या वांगडा आसा आनी रावतलों. गोंयकारांच्या हातांत हो एकूच परंपरीक वेवसाय उरला, तो सांबाळून दवरपाची गरज आसा, अशें तांणी सांगलें.
थळावे तशेंच उत्तर गोंय आनी दक्षीण गोंय टॅक्सी वेवसायीक संघटणांच्या प्रतिनिधींनी आमदार वास हांची तांच्या कार्यालयांत भेट घेवन तांचे कडेन चर्चा करून समस्या मांडल्यो. वास हांणी तांच्यो समस्या आयकून घेतल्यो आनी तांकां सगळे तरेचो तेंको दिलो. टॅक्सी वेवसायिकांनी हो परंपरीक वेवसाय सांबाळून दवरला. ह्या वेवसायाक लागून तरणाट्यांक आपरोजगार उपलब्ध जाला. जर ह वेवसाय बंद जालो जाल्यार तांचे मुखार पोट भरपाचो प्रस्न उबो रावतलो, अशें आमदार वास हांणी म्हणलां.
टॅक्सी वेवसायिकांक माफिया म्हणल्यार कितले मेरेन योग्य आसा, असो प्रस्न तांणी उपस्थीत केला. जर खंयचोय टॅक्सीकार चड भाडें घेता जाल्यार, जाल्यार ते संबंदांत कागाळ करपाची गरज आसा. ह्या टॅक्सी वेवसायिकांक सध्या भाडें मेळप कठीण जालां. ताका लागून बँकेचे हप्ते कशे फारीक करचे, हो प्रस्न तांकां सतयता, अशें वास हांणी स्पश्ट केलें.
टॅक्सी वेवसायीक संघटणेचे अध्यक्ष सुनील नायक हांणी सांगलें, आमच्या पोटाचेर पांय दवरपी टॅक्सी अॅग्रिगेटर सरकारान हाडचो न्हय. टॅक्सी अॅग्रिगेटर मार्गदर्शक 2025 क आमचो विरोध आसा. ती अधिसुचोवणी आमच्या हिता आड आसा. टॅक्सी वेवसाय हो एकसुरो वेवसाय गोंयकारांच्या हातांत उरला, तो लेगीत आतां बिगर गोंयकारांच्या हातांत वचपाचो भंय आसा. आमी सरकारा कडेन चर्चा करपाक अजून तयार आसात. टॅक्सी भाडें समान दवरचें, अशी मागणी आमी सरकारा कडेन करीत आसात, पूण अजून ती मान्य जावंक ना, अशें तांणी सांगलें. गोंया भायले जे कोण टॅक्सींत बसतात, तांकां आमी गोंयचे संस्कृतीचें दर्शन घडयतात, अशें एका टॅक्सी वेवसायिकान सांगलें. टॅक्सी अॅग्रिगेटर हाडून आमच्या पोटाचेर मारू नाकात, अशीय विनवणी ताणें केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
