भांगरभूंय | प्रतिनिधी
आमदार केदार नायक हांची म्हायती
दर्यादेग वाठारांतले आमदारूय घेतले भेट
अॅप एग्रिगेटर धोरणाक विरोध
भांगरभूंय । प्रतिनिधी
पणजी : सरकाराच्या प्रस्तावीत अॅप एग्रिगेटर धोरणाक थळाव्या टॅक्सीकारांचो विरोध आसून ते आमदारांच्यो भेटी घेत आसात. प्रस्तावीत मार्गदर्शक तत्वां/ धोरणा संबंदांतले थळाव्या टॅक्सीकारांचे प्रस्न दर्यादेग वाठारांतले आमदार मुख्यमंत्री डॉ. प्रमोद सावंत हांची भेट घेवन मांडटले, अशी म्हायती आमदार केदार नायक हांणी दिली.
थळाव्या टॅक्सीकारांनी आमदार केदार नायक हांची भेट घेवन तांचे मुखार समस्या मांडल्यो. उण्या अंतराच्या प्रवासा खातीर भाड्याचे दर खूब उणें आसा. ह्या दरान वाड जावपाक जाय, अशी मागणी टॅक्सीकारांनी केल्या.
भाड्याचे टॅक्सी सेवे खातीर किलोमिटरा फाटल्यान सरकाराचो 36 रुपया दर आसा.
अॅप एग्रिगेटरांत वांटेकार जाले उपरांत लेगीत टॅक्सी चालकांक किलोमिटरा फाटल्यान 36 रुपयाच मेळटले. एग्रिगेटराचे 30 रुपया कमिशन गिरायकाक फारीक करचे पडटले. हाका लागून 10 किमि प्रवासा खातीर गिरायकाक 390 रुपया फारीक करचे पडटले. टॅक्सी चालकाक 360 रुपया मेळटले. हे तजविजेक लेगीत टॅक्सीकारांचो विरोध आसा.
येरादारी अॅप एग्रिगेटरां खातीर नोंदणी शुल्क 5 लाख करपा सयत सुरक्षा हमी रक्कम 10 लाख रुपया करपाचो प्रस्ताव आसा.
टॅक्सी सयत मोटारसायकल पालयटां खातीर लेगीत अॅप सेवेंत हाडपाचो प्रस्ताव आसा. टॅक्सी तशेंच मोटारसायकल पायलटां खातीर अॅप एग्रिगेटरा कडेन नोंदणी जावपाची सक्ती ना. तरी अॅप एग्रिगेटरा खाला येवपी टॅक्सी तशेंच मोटारसायकल पायलटांक विम्या सयत हेर सवलतींचो लाव जातलो.
गोंयांत सेवा दिवपा खातीर एग्रिगेटराक नोंदणी सयत 5 लाख रुपयांचो परवानो शुल्क फारीक करचो पडटलो. परवान्याच्या नुतनीकरणा खातीर 5 लाखांचें शुल्क आसतलें. तशेंच सुरक्षा हमी रक्कम 10 लाख रुपया फारीक करची पडटली. एग्रिगेटराक टॅक्सीच्या धनयाक सरकारान निश्चीत केल्ली उण्यांत उणी रक्कम दिवचीच पडटली. प्रवास पुराय जाले उपरांत 72 वरां भितर ही रक्कम दिवची पडटली. 72 वरां भितर धनयाक पयशें मेळ्ळे ना जाल्यार दिसाक 25 टक्के कळंतरान पयशें दिवचे पडटले. एग्रिगेटरांनी परवानो नासतना अॅप सेवा सुरू केली जाल्यार 50 लाखांचो दंड जातलो. हेर नेम मोडल्यार 5 लाखाच्या दंडाची तजवीज आसा.
जुन्ता हावस वाठारांत आयज जमावबंदी
अॅप एग्रिगेटर धोरणाक विरोध नोंद करपा खातीर आयज दनपारां 2 वरांचेर पणजे, जुन्ता हावस इमारतींतल्या येरादारी खात्यान सुमार 2 हजारां वयर टॅक्सीकार एकठांय येवन हरकती सादर करपाचे आसात. उत्तर गोंय पुलीस अधिक्षकां कडल्यान ही म्हायती मेळ्ळे उपरांत उत्तर गोंय जिल्होधिकाऱ्यान भारतीय न्याय संहितेच्या 163 कलमा खाला जमावबंदीचो आदेश जारी केला. हाका लागून जुन्ता हावस वाठारांत पांच परस चड लोक एकठांय येवपाचेर बंदी आसा. तशेंच निदर्शनां, मोर्चो, लावडस्पिकराचो वापर, बॅनराचो वापर करपाचेर बंदी आसा. हो आदेश मोडलो जाल्यार भारतीय न्याय संहितेच्या कलम 223 खाला कारवाय जातली, अशें उत्तर गोंय जिल्होधिकाऱ्यान आदेशांत स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
