भांगरभूंय | प्रतिनिधी
भांगरभूंय । खबरां मेज
पणजीः गोंयांत पर्यटना खातीर क्रूज बोटीन आयिल्ल्या सुमार 100 अमेरिकन पर्यटकांक मुरगांव बंदरात थळाव्या टॅक्सी ड्रायव्हरांनी जी वागणूक दिली ताचो गोंय चेंबर ऑफ कॉर्मसान निशेध केला. असल्या घडणुकांक लागून गोंय आनी गोंयच्या लोकांचें नांव बदनाम जातलें अशी भिरांत उक्तावऩ जाल्ल्या प्रकाराक लागून तांणी अमेरिकन पर्यटकांची माफी मागल्या.
अमेरिकन पर्यटकांत दिल्ले वांगणुकेक लागून कांय नामनेच्या क्रूज ऑपरेटरांनी गोंयांत येवपाचो बेत रद्द केल्ल्याची खबर आसा. टॅक्सीवाल्यांक फुटकळ राजकारण्यांची फूस आशिल्ली अशें जीसीसीआयन एका प्रसिद्धी पत्रकांत नमूद केलां. प्रवाश्यांक आपल्याक जाय त्या वाहनांतल्यान प्रवास करपाचो अधिकार आसा असें मुंबय उच्च न्यायालयान आपल्या आदेशांत सांगलां. अमेरिकन पर्यटकांक बशीनी वचपाक आडमेळे हाडून टॅक्सीवाल्यांनी न्यायालयाचो अवमान केला अशें तांणी म्हणलां.
टॅक्सीवाल्यांची दादागिरी फकत मुरगांव बंदरांत न्हय जाल्यार दक्षीण गोंयांतल्या जायत्या हॉटेलांनी लेगीत चलता. ताका लागून दक्षीण गोंयांत पर्यटक येवप बंद जातलें आनी ताचो फटको टॅक्सीवाल्यांक बसतलो हे मतींत दवोरपाक जाय अशें अशें सागून मुरगांव बंदरांत जांणी दादागिरी केली तांचे आड सरकारान कारवाय करची हे खातीर चेंबर यत्न करतलें अशें प्रसिद्धी पत्रकांत सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
