भांगरभूंय | प्रतिनिधी
मोपा ग्रीन फिल्ड टॅक्सी असोसिएशनः खर आंदोलनाची शिटकावणी
भांगरभूंय । प्रतिनिधी
पेडणें: मोपा विमानतळाचेर येरादारी खातें आनी गोंय सरकार हांणी आठ दिसां भितर यलो ब्लॅक टॅक्सी कावंटर वा ब्ल्यू टॅक्सी कावंटर खासा पेडणेंकारां खातीर सुरू केलो ना जाल्यार खर आंदोलन करतले. रस्ते आडायतले. तशेंच ज्या पेडणेंकारांनी, टॅक्सी वेवसायिकांनी आपलो घरसंवसार चलोवचे खातीर हाडिल्ल्यो गाडयो घेवन रस्त्याचेर ठिय्या आंदोलन करतले, अशी शिटकावणी ग्रीन फिल्ड मोपा टॅक्सी असोसिएशना वतीन पेडण्यां घेतिल्ले पत्रकार परिशदेंत दिली.
हे पत्रकार परिशदेक ग्रीन फिल्ड अध्यक्ष उदय महाले, उपाध्यक्ष भास्कर नारूलकार, पदाधिकारी अॅड. जितेंद्र गांवकार, अॅड. प्रसाद शहापूरकार, संजू आरोसकार, भांडारी सुरेश परब तशेंच टॅक्सी धनी हाजीर आशिल्ले.
सुरवेक पेडणें म्हाल सहाय्यक येरादारी अधिकारी राजेश नायक हांकां हे संबंदांत निवेदन भेटयले. आठ दिसां भितर मोपा विमानतळाचेर पेडणेंकारां खातीर टॅक्सी कावंटर सुरू करचो, नाजाल्यार खर आंदोलन करतले. हाका पुराय जापसालदार सरकार आसतलें, अशें निवेदनांत म्हणलां.
पत्रकारां कडेन उलयतना भास्कर नारुलकार हांणी सांगलें, फाटले कितलेशेच म्हयने आमी पेडणेंकारां खातीर मोपा विमातळाचेर टॅक्सी कावंटराची मागणी करतात, पूण सरकार हो विशय फुडें फुडें धुकलीत आसा. मोपा विमानतळार सध्या खाजगी टॅक्सी कावंटर दिवपाचें काम जीएमआर कंपनी आनी सरकारान सुरू केलां. मोपा विमानतळा खातीर पेडणेंच्यो जमनी सवाय भितर घेवन शेतकारांच्या तोंडाक पानां पुसल्यांत. टॅक्सी भावांक रोजगार मेळपाचें हें एकसुरें साधन आशिल्लें, अशें संघटणेन म्हणलां.
अॅड. शहापूरकार हांणी सांगलें, आपल्या न्याय हक्का खातीर फाटले कितलेशेच म्हयने हे टॅक्सीकार भाव आंदोलन करतात. मात सरकार तांचे कडेन आडनदर करीत आसा. हो प्रकार सामको दुखदिणो. जांच्यो जमनी गेल्यात ते भूंयपूत बेरोजगार आसात. तांच्या पोटापाणयाचो प्रस्न गंभीर जाला. ते खातीर आतां चड वेळ काडिनासतना सरकारान आठ दिसां भितर तांकां टॅक्सी कावंटर दिवचो, अशी तांणी मागणी केली.
उत्तर गोंय काँग्रेस सरचिटणीस अॅड. गांवकार हांणी सांगलें, मोपा विमानतळा खातीर जांच्यो जमनी गेल्यात तांचे भितरल्या कांय जाणांक अजून मोबदलो मेळूंक ना. पेडणेंचे टॅक्सीकार भाव आपल्या हक्का खातीर, आपल्याक रोजगार मेळचो हे खातीर टॅक्सी कावंटराची मागणी करतात. मात सरकारान हो कावंटर अजून लेगीत अधिसुचीत करूंक ना. मात थंय बेकायदो आनी खाजगी कावंटर व्हड प्रमाणांत सुरू आसात. दक्षीण गोंयांतल्यो चड करून वास्कोच्यो व्हड प्रमाणांत टॅक्सी भाडी मारतात. जर आठ दिसां भितर कावंटराची मागणी मान्य केली नाजाल्यार येरादारी मंत्री मॉवीन गुदिन्हो हांणी येरादारी मंत्रीपदाचो राजिनामो दिवचो. तशेंच मुख्यमंत्री डॉ. प्रमोद सावंत हांणी येरादारी खात्याचे संचालकाक निलंबीत करचो, अशी तांणी मागणी केली. उदय महाले हांणी सांगलें, आमची मागणी योग्य आसा. मोपा विमानतळाचेर थळाव्या टॅक्सीकार भावांक रोजगार मेळचो हें आमचें ध्येय आसा. आतां आमची सोशीकसाण सोंपत आयल्या. आमकां टॅक्सी कावंटर मेळूंक ना जाल्यार खर आंदोलन करचेंच पडटलें, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
