भांगरभूंय | प्रतिनिधी
सरकार अॅपाचेर ठाम, टॅक्सी धनयांचो अॅपाक न्हयकार
भांगरभूंय । प्रतिनिधी
पणजीः टॅक्सी अॅपा विशीं अजूनय कोफुसांव चल्लां. थळाव्या टॅक्सीकारांनी अॅपाक सारकोच न्हयकार दिला. पूण सरकार टॅक्सी अॅपाचेर ठाम आसा. सध्या टॅक्सी भाड्याचे दर डिजिटायज करपाचें थारयलां आनी हे विशीं सरकार आनी टॅक्सी धनयांची एक समन्वय समिती स्थापन जाल्या. पूण टॅक्सी अॅपाच्या विशयाचेर अजून मेरेन कसलोच उपाय येवंक ना.
अॅपा विशीं चर्चा करपा खातीर मुख्यमंत्री डॉ. प्रमोद सावंत हांणी टॅक्सी ऑपरेटर्सांची बसका आपयल्ली. मंत्रालयांत जाल्ले बसकेंत येरादारी मंत्री मावीन गुदीन्हो, पर्यटन मंत्री रोहन खंवटे, कळंगूटचे आमदार मायकल लोबो, साळगांवचे आमदार केदार नायक तशेंच विवीध टॅक्सी संघटनेचे पदाधिकारी हाजीर आशिल्ले.
बसके उपरांत उलयतना मुख्यमंत्री डॉ. प्रमोद सावंत हांणी ही बसका सकारात्मक रितीन जाल्ल्याचें सांगलें.
तांणी अॅपाचो आस्पाव करचो. आमी तांकां बरो दर दितले. सध्या आमी तीन येरादारी खात्याचे अधिकारी आनी 10-12 टॅक्सी संघटनेचे वांगडी आशिल्ले समन्वय समिती स्थापन केल्या. टॅक्सी धनी आपल्यो सगल्यो समस्या ह्या अधिकाऱ्या मुखार मांडटले. येता ते सोमारा हे समितीची बसका जावन 8-10 दिसां भितर हे सगले विशय सुटावे जातले, अशी म्हायती मुख्यमंत्र्यान दिली.
फकत गिरायकूच न्हय तर टॅक्सीकारांची सुरक्षा, राखण आनी पार्दशकताय हे विशय आमकां सुटावे करपाक जाय. हे सगले विशय सुटावे करपाक टॅक्सी धनी शंबर टक्के सकारात्मक आसात, अशें मुख्यमंत्र्यान म्हणलें.
आमी अॅपाचो केन्नाच आस्पाव करचे नात. पूण आमी टॅक्सी भाड्याचे दर डिजिटायस करपाची मागणी केल्ल्याचें, अखील गोंय टॅक्सी धनी संघटनेचे अध्यक्ष चेतन कामत हांणी सांगलें.
गोवा मायल्स रद्द करपा खातीर आमी सुचोवणी दिल्या. सध्या येरादारी खात्याचे तीन अधिकारी आनी आमचो आस्पाव आसपी एक समिती तयार केल्या. हे बसकेंत सगले टॅक्सी धनी हजर रावपाक शकले नात. देखून आमी पयली तांकां विस्वासांत घेवन तांच्यो सुचोवण्यो अधिकाऱ्या मुखार मांडटले. दर थळाचेर दर निश्चीत करून ते डिजिटायज करपाक जाय. आमकां अॅप नाका, अशें कामत हांणी म्हणलें.
सोशल मिडियाच्या माध्यमांतल्यान जावपी गजाली बंद करपा खातीर टॅक्सीकारांचो तेंको जाय. धोरणा वरवीं टॅक्सी भावां खातीर एक दर निश्चीत करपाचो विचार तांचे मुखार दवरला, तशेंच तांचे विचार आयकून घेतल्यात. टॅक्सीकारांकूच घेवन हो विशय सुटावो करपाक जाय म्हूण मुख्यमंत्र्याची भुमिका स्पश्ट आसा.
पर्यटन मंत्री रोहन खंवटे
डिजिटल माची तयार करून समान दर लागू करपाची संकल्पना आसा. फक्त गोवा मायल्स आनी गोवा टॅक्सी अॅप हे दोनूच अॅप आसतले अशें तांकां सांगून तांची हेर समस्या मांडपाक सांगलां. येरादारी खात्याचे तीन अधिकारी सोमार बसका घेवन तांचें म्हणणें आयकून घेतले. सुरक्षा, पारदर्शकता आनी तांच्या स्वताच्या हिता खातीर टॅक्सीकारांनी डिजिटल माचयेर येवचें.
मावीन गुदिन्हो येरादारी मंत्री
फक्त चर्चा करचे सोडून एक समिती गठीत करपाची मागणी मुख्यमंत्री डॉ. प्रमोद सावंत हांचे कडेन केली. तातूंत येरादारी खात्याचे उपसंचालक सावंत, सहाय्यक संचालक मिनेश तार, एडवीन आनी लाडू गांवकार ह्या चार वांगड्यांची समिती गठीत केल्या. सगल्या टॅक्सी संघटनाक तांचे कितें विशय आसात ते ह्या अधिकाऱ्यां मुखार मांडपाचो सल्लो दिला.
सुदीप ताम्हणकार, टॅक्सी संघटनेचे प्रतिनिधी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
