भांगरभूंय | प्रतिनिधी
मोपा विमानतळ टॅक्सी प्रस्ना विशीं सरकाराचे अनास्थेचो निशेध
भांगरभूंय । प्रतिनिधी
पेडणें: मोपा विमानतळा वयल्या टॅक्स वेवसायिकांचो प्रस्न सोडोवपा संबंदांत सरकारा कडल्यान अनास्था दाखयिल्ल्यान ताचो निशेध करचे खातीर बिरेस्तारा 22 ऑगस्टाक पेडण्यां चक्काजाम करपाची घोशणा केल्या. ह्या संबंदांत पेडणें उपजिल्होधिकाऱ्याक निवेदन सादर केलां. सरकारान हो विशय सोडयलो ना जाल्यार कायदो सुवेवस्थेचो प्रस्न उप्रासपाक शकता आनी ताका पुराय तरेन सरकार जापसालदार आसतलें, अशीय शिटकावणी तांणी दिल्या.
मोपा विमानतळाचेर पेडणेंकारांक ब्ल्यू कॅप टॅक्सी परवाने दिल्यात, पूम हेर कावंटरांक लागून ह्या टॅक्सी वेवसायिकांक आपलो वेवसाय करप कठीण जायत चल्लां. मोपा विमानतळ पिडीत लोकां खातीर वेगळी सवलत दिनासतना तांचे कडल्यानूय जीएमआर कंपनी सुमारा भायर शुल्क घेता. गोवा मायल्स कावंटराक लागून ह्या वेवसायिकां मुखार कठीण प्रस्न उपस्थीत जाला. थळाव्यांनी वेवसाय करचे खातीर रीण काडून टॅक्सी विकत्यो घेतल्यात. ह्या टॅक्सींचे हप्ते भरपूय आतां कुस्तार जायत चल्लां. थळाव्यांची ही खेबाडां बेगिनात बेगीन बंद करची, असो उलो टॅक्सीकारांनी मारला. बिरेस्तारा 22 ऑगस्टाक गोंयभरांतले टॅक्सी वेवसायीक एकठांय जातले. मोपा विमानतळाक लागून थळाव्यांक रोजगार, वेवसाय संदी मेळटली अशीं आस्वासनां दिल्लीं. तातूंतलें एकूय आस्वासन पुराय करूंक ना. रोजगाराचे बाबतींत कंत्राटी पद्दतीचेर थळाव्यांची सतवणूक चल्ल्या, जाल्यार टॅक्सी वेवसायाच्या नांवान थळाव्यांची फटवणूक चालू आसा. गोवा मायल्स ही अॅप आदारीत टॅक्सी कंपनी आसा. तांकां मोपा विमानतळाचेर कावंटर कसो कितें दिलो, असो प्रस्न ह्या वेळार उपस्थीत केलो. मोपा विमानतळा वयल्या कावंटराचेर शुल्क, पार्कींग शुल्क, प्रवेश शुल्क तशेंच लींक रोडाचेर शुल्क घेतात. ह्या शुल्कांच्या चक्रव्युहांत थळाव्या टॅक्सी वेवसायिकांक घुस्पावन तांकां वेवसाय करप कठीण जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
