भांगरभूंय | प्रतिनिधी
आस्वासनांक पाळो दिवंक ना असो आरोप करीत टॅक्सीकार विधानसभे भायर
पणजीः गोंय राज्य टॅक्सी धोरणाचो मसुदो तयार करपाचें काम चालू आसा. तो उजवाडाक हाडचे पयलीं टॅक्सी संघटणेक विस्वासांत घेतले. देखून आपलो धंदो सोडून आंदोलन करपाची गरज ना, असो उलो मुख्यमंत्री डॉ. प्रमोद सावंत हांणी मारला.
१० सप्टेंबराक टॅक्सी खातीर गोंय राज्य धोरण हाडपाच्या आस्वासनाक डॉ. सावंत हांणी पाळो दिवंक नाशिल्ल्यान पर्वरे विधानसभे भायर टॅक्सीकार एकठांय जाले आनी तांणी बोवाळ घालो. हें आस्वासन केन्ना पुराय जातलें हे विशीं मुख्यमंत्र्यान स्पश्टीकरण दिवपाची मागणी केली.
टॅक्सी खातीर धोरण तयार करतले अशें सागून आमचे वांगडा फटींगपणा कित्याक केली, हो प्रश्न विचारपाक आमी आयल्यात, असो आरोप टॅक्सी संघटणेचे फुडारी चेतन कामत हांणी केला.
१० संप्टेबराक टॅक्सी संघटनांक आपोवन धोरण तयार करतले अशें सांगिल्लें. हे विशीं आमी जायत्या आमदारांक फोन केलो. तांणी हे विशीं सरकारा कडल्यान प्रतिसाद मेळूंक ना अशें आमकां सांगिल्ल्याचें कामत हांणी म्हणलें.
सरकाराचेर विस्वास दवरात आमी तुमकां फटोवचे नात अशें आस्वासन मुख्यमंत्र्यान आमकां बसके वेळार दिल्लें. मात खंयतरी अशें दिसून आयलां की सरकाराचेर विस्वास दवरून आमी स्वता फसल्यात. आयज जे गोंयकार आमकां वायट म्हणटाले तांणी आतां चिंतचें की फटींग कोण ते. कितेंय बरें घडटलें म्हण आमी इतले दीस ओग्गी आसले, अशें कामत हांणी सांगलें.
सावंत हांचें स्पश्टीकरण
टॅक्सीकारांक विस्वासांत घेवनच निर्णय जातलो, अशें सांगलां, देखून अशे पद्दतीन सचिवालयां भायर येवन उबे रावपाची गरज ना, अशें डाॅ. सावंत हांणी सांगलें. सरकाराचेर आनी म्हजेर विस्वास दवरचो. १० तारखेक करतले म्हणल्यार ते तेन्नाच जातलें असो अर्थ लावन घेवचो न्हय. हे खातीर ८ दीस तरी लागतले. हो मसुदो उजवाडाक हाडचे पयलीं २० संघटनांक विस्वासांत घेतले. ते खातीर संघटनेच्या प्रतिनिधींचीं नांवां दिवपाक सांगलां. हो मसुदो उजवाडाक हाडचे पयलीं तांकां दाखयतले आनी कितेंय दुबाव आसल्यार ते पयस करतले. तुमकां विस्वासांत घेतले बगर कसलोच निर्णय घेवचे नात, अशें स्पश्टीकरण मुख्यमंत्र्यान आयज दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
