भांगरभूंय | प्रतिनिधी
-मंत्रीमंडळ बसकेंत तीन मंत्र्यांची मागणी; मुख्यमंत्र्यांची चवकशीची हमीपणजीः कांय दिसां आदीं गोंया सयत देशभर गाजिल्लो ‘टूलकीट प्रकरण’ हो विशय बुधवारा राज्य मंत्रीमंडळ बसकेंत मुखार आयलो. ह्या प्रकरणाची खोलायन पुराय चवकशी करची अशी मागणी तिनूय मंत्र्यांनी मुख्यमंत्री डॉ. प्रमोद सावंत हांचे कडेन केली. ताचेर मुख्यमंत्र्यांनी मंत्रीमंडळाक चवकशी करपाची हमी दिल्या अशें सूत्रांनी आमच्या प्रतिनिधी कडेन उलयतना सांगलें.
कांय दिसां आदीं मुख्यमंत्री डॉ. प्रमोद सावंत आनी गोंयच्या पर्यटना सयत कांय मंत्र्यांनी तांची बदनामी करपाक सुरवात केल्ली. हाका लागून लोकां मदीं गोंदळ जालो. हो विशय बुधवारा जाल्ले मंत्रीमंडळ बसकेंत आयलो. वजनदार खातीं आशिल्ल्या तीन मंत्र्यांनी हो प्रस्न बसकेंत मांडलो आनी ‘टूलकीट’ प्रस्नाच्या मुळाक वचपाची मागणी मुख्यमंत्र्यां कडेन केली. पेड इन्फ्लुएंसरां वरवीं गोंय आनी मुख्यमंत्र्यांची बदनामी करपी लोकांक भायल्या लोकांचो तशेंच कांय थळाव्या लोकांचो तेंको आसा. ताचो सोद घेवन तांचे आड कारवाय करची अशी मागणी ह्या तिनूय मंत्र्यांनी मुख्यमंत्र्या कडेन केल्या. मुख्यमंत्र्यानी बसकेंत ह्या प्रकरणाची चवकशी करपाची हमी दिल्या अशें सूत्रांनी सांगलें.
मजगतीं, मुख्यमंत्री डॉ. सावंत हांकां सोशल मिडिया वरवीं लक्ष्य करून वैयक्तीक बदनामी केली. ते उपरांत राज्यांत वेगवेगळ्या कारणांक लागून पर्यटकांचो आंकडो उणो जाला असो दावो करून मीम्स तयार करून आनी सोशल मिडिया वरवीं तें पातळायल्ले. राज्याची बदनामी जाल्या असो दावो करून मुख्यमंत्र्यांनी ह्या प्रकरणाची पुराय चवकशी करून तातूंत आस्पाव आशिल्ल्यां आड कारवाय करची अशी मागणी मुख्यमंत्र्यां कडेन केल्या असोय उल्लेख सूत्रांनी केलाे.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
