टुगेदर फॉर युनिव्हर्सिटी पॅनलाची गोंय विद्यापिठाच्या कार्यकारी समितीचेर निवड

भांगरभूंय | प्रतिनिधी

पणजीः एनएसयूआयचो तेंको आशिल्ल्या पॅनलाक हारोवन गोंय विद्यापीठ कॅम्पस

विद्यार्थी संघ वेंचणुकेंत टूगेदर फॉर युनिव्हर्सिटी पॅनलान जैत मेळयलें. ह्या पॅनलाचे सगले वांगडी वेंचून आयले. बस शेड, मोबायल नॅटवर्क तशेंच हॉस्टेलांत वेळांत वाड हे सारीकिल्ल्या विशया खातीर यत्न करपाचे अशें नवीन समितीन सांगलें.

टुगेदर फॉर युनिव्हर्सिटी पॅनलाचे वेंचून आयिल्ले वांगडी सतेज खांडेपार हांची अध्यक्ष म्हूण निवड जाली, जाल्यार चेतन नायक हांची सचीव, वैभव पै हांची खेळां आनी सांस्कृतीक सचीव, प्रभा नायक बायलां प्रतिनिधी आनी आर्या प्रभुदेसाय हांची संसोधन विद्यार्थी प्रतिनिधी म्हूण नेमणूक जाली.

वेंचून आयले उपरांत पत्रकारां कडेन उलयतना अध्यक्ष सतेज खांडेपारकार हांणी सांगलें, अामचो मुखेल विशय आसा तो बसशेड. गोंय विद्यापिठा कडेन बसशेड नाशिल्ल्यान विद्यार्थ्यांक बसीं खातीर वाट पळयत उबे रावचे पडटा. तो उबारपाक आमी बेगोबेग यत्न करतले.

मोबायल नॅटवर्क आनी वायफाय हो आमचो दुसरो विशय आसा. विद्यापिठाच्या ब्लॉक ए, बी आनी सीत रेंजीची समस्या आसा. जर घरा फोन लायतले जाल्यार तांकां सामकी रेंज आसना. हे खातीर हांगासर मोबायल टाॅवर वा वायफाय बसोवन तांची वेवस्था करतले, अशे सतेज हांणी सांगलें.

ते भायर चलयांचे होस्टेलांखातीर वेळ वाडोपांखातीर आमी यत्न करतले. सद्या हॉस्टेलाची वेळ रातचे 8 वरां मेरेनूच आसा आनी हो वेळ खूब उणो आसा. हो वेळ मर्यादा वाडोवन ती रातचे 9.30 मेरेन वाडोवपा खातीर आमचे यत्न आसतले.

भुरग्यांचे सगळी समस्या आनी प्रस्न आयकून ते आमी सुटावे करतले, अशें आस्वासन सतेज हांणी दिले.

फाटले वेंचणुकेंत विद्यापीठ प्रतिनिधी विद्यापिठाचे हे कार्यकारी समितीक वेंचून हाडटाले. अंदूं पयलेच खेपे पुराय विद्यापिठाचे विद्यार्थ्यांक मत दिवन पॅनल वेंचून हाडपाची संद मेळ्ळ्या, अशी म्हायती पॅनलाचे वांगडी रुशांक नायक हांणी दिली.

टुगेदर फॉर युनिव्हर्सिटी, एनएससुआयचे पॅनल आनी कांय अपक्ष उमेदवार रिंगणांत आशिल्ले. आमी भुरग्यांक घेवन फुडे वतले म्हूण सांगिल्लें आनी भुरग्यांनींच आमकां 10 वे खेपे वेंचून हाडून एनएनसुआयच्या पॅनलाक हारयल्या, अशें नायक हांणी सांगलें.