भांगरभूंय | प्रतिनिधी
खबरां संस्था
पर्थः टी-20 वर्ल्ड कप सर्तींत पाकिस्तानान पयलें जैत मेळयतना नेदरलँडाक 6 विकेटीनी हारयलें. पर्थ हांगा खेळयल्ले हे मॅचींत नेदरलँडान पाकिस्तानाक 92 धांवड्याचें आव्हान दिल्लें. पाकिस्तानान 13.5 ओव्हरींत हें लक्ष्य हातासलें.
92 धांवड्यांचो फाटलाव करतना पाकिस्तानान बाबर आमझाच्या रुपांय पयलो गडी वोगडायलो. बाबर सेगीत तिसरे मॅचींत फेल जालो. तो फकत 4 धांवड्यो करून रनआवट जालो. तशेंच फखर जमान लेगीत 16 बॉलांत 20 धांवड्यो करून पॅव्हेलियनांत परतलो. पाकिस्ताना वतीन सगल्यांत चड धांवड्यांचें योगदान मोहम्मद रिझवानान दिलें. ताणे 39 बॉलांत 5 चौक्यांनी 49 धांवड्यो केल्यो. तागेलो अर्द शेंकडो फकत एक धांवडेक लागून पुराय जालें ना तरी पंगडाक जैतिवंत केल्ल्याची खोश ताका मेळ्ळी. नेदरलँडाच्या ब्रँडन ग्लोव्हरान 2 आनी पॉल व्हॅन मिकरेन एक विकेट घेतली.
नेदरलँडाच्या कॅप्टन एडवर्डान टॉस जिखून पयलीं खेळपाचो निर्णय घेतलो. मात 20 ओव्हरींत 9 गडी वगडावन ते फकत 91 धांवड्यो करपाक शकले. कॉलीन अकरमन (27) आनी कॅप्टन स्कॉट एडवर्ड (15) सोडल्यार हेर बॅट्समन दोन अंकी धांवड्यो करपाक शकले नात. बास दी लीड तकलेर रौफाचो बॉल बशिल्ल्यान रिटायर्ड हर्ट जालो. पाकिस्ताना वतीन शादाब खानान 4 ओव्हरींत 22 धांवड्यो दिवंन 3 विकेटी घेतल्यो. मोहम्मद वसीन ज्युनियरान 3 ओव्हरींत 15 धांवड्यो दिवंन 2 विकेटी घेतल्यो. शाहीन आफ्रिदी, नसीम शाह आनी हरिस रौफान दरेकी एक विकेट घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
