भांगरभूंय | प्रतिनिधी
मुंबय, खबरां संस्था: आंतरराष्ट्रीय पांवड्यावेले संगीत निर्माता केएमकेझेड (KMKZ) हांणी भारतीय संगीत कंपनी टी-सीरीज आनी संगीतकार जोडी सचेत- परंपरा हांचेर गंभीर आरोप केल्यात. केएमकेझेड हांच्या मता प्रमाण, OTT चित्रपट ‘दो पत्ती’च्या ‘रांझन’×ह्या गीतांत तांणी तयार केल्ले बीट तांची परवानगी घेनासतना आनी कसलेच तरेचें श्रेय दिनासतना वापरल्यात.
संबंदीत गीत अभिनेत्री कृति सेननच्या ‘दो पत्ती’ ह्या चित्रपटात सादर केलां. हें गीत बरेंच फामाद जालां. यूट्यूबार ह्या गीताक आतां मेरेन ३३ कोटीं परस चड व्ह्यूज मेळ्ळ्यात. जाल्यार संगीत ऍप स्पॉटिफायचेर २९ कोटीं परस चड स्ट्रीम्स नोंद जाल्यात.
केएमकेझेड हांणी सोशल मीडियाचेर आपली भुमिका स्पश्ट करीत ह्या गीता कडेन संबंदीत व्हिडिओ आनी पुरावे सादर केल्यात. तांणी संगीत उद्देगांतलें क्रेडीट आनी परवानगेची संस्कृती राखून दवरपाचेर भर दीत न्याय मेळचो म्हूण मागणी केली.
मजगतीं, टी-सीरीज वा सचेत-परंपरा हांणी ह्या आरोपां विशीं आजूनय कसलीच प्रतिक्रिया दिवंक ना. मात हो वाद फुडल कांय दीस संगीताच्या मळार नवी चर्चा निर्माण करतलो, अशी चर्चा जाता.
कांय जाणांच्या मतान हें गीत ‘रोझा’ सिनेमांतल्या ‘ए हँसी वादियॉं…’ ह्या ए आर रेहमान हांच्या गीताचेर आदारून आसा. म्हळ्यार बीट कोणें चोरले? सचेत – परंपरा हांणी काय रेहमान हांणी अशी वेगळी चर्चाय सुरू आसा
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
