भांगरभूंय | प्रतिनिधी
एफआयराच्यो प्रती मेळ्ळे उपरांत सरकाराक हाडटले उक्ताडारः आरजीपी
पणजीः कलम ३९ (अ) आड आमरण उपोशणाक बशिल्ले सांत आंद्रेचे आमदार विरेश बोरकार हांचे मुखार एक नवें आव्हान आयलां. टीसीपी कार्यालयांत बसून आंदोलन केल्ल्याच्या आरोपा खाला बोरकार तशेंच आंदोलन करपी पाळें-शिरोदणच्या थळाव्यां आड पणजे पुलीस स्टेशनांत कागाळ नोंद जावन पणजे पुलिसांनी तांचेर एफआयआर नोंद केल्या.
कलम ३९ (अ) रद्द करप तशेंच मारपेट केल्ल्या पुलिसांक निलंबीत करपाची मागणी करपी विरेश बोरकार हांचें आंदोलन सेगीत सव्या दिसा पावलां. बोरकार हांची सद्या भलायकी इबाडल्या. स दीस सेगीत जेवण आनी उदक नाशिल्ल्यान तांकां अशक्तपणां आयल्यां आनी ते पुराय दीस हांतरुणाचेर पडून आसतात. तांकां उलोवप सुध्दा कठीण वता.
बोरकार हांणी मरणाकडेन झुंज चालू आसतनाच तांचे अडचणींत वाड जायत आसा. नगर नियोजन कचेरी भितर बसून आंदोलन केल्ल्यान आनी हें आंदोलना वेळार कलम ३९ (अ)च्यो महत्वाचो फायली गायब जाल्ल्या प्रकरणांत पणजे पुलिसांनी बोरकार आनी थळाव्यां आड एफआयर नोंद केल्या. मात थळावे सरकाराचे हे कारवाये आड खर भुमिक घेवपाचे आसात. सद्या आंदोलकांचे वकील सुरेश पालकार हांणी पणजे पुलिसांक पत्र बरोवन एफआयआरच्यो प्रती मागयल्यात.
सद्या आमकां एफआयराच्यो प्रती मेळूंक नात देखून सद्या कसल्या कारणांक लागून आमचेर गुन्यांव नोंद जाला? हें आमकां अजून स्पश्ट कळूंक ना. एकदां एफआयराच्यो प्रती आमकां मेळूंदी. आयज सांजेवेळा मेरेन पत्रकार परिशद घेवन आमी सरकाराक उक्ताडार हाडटले. टीसीपी कचेरेंत आंदोलन करपाचे घडणुकेक आठ दिस मायज जाले आनी फायली चोरयेक गेल्ल्याचें तांकां आठ दिसां उपरांत कळ्ळें. टीसीपीच्या अधिकार्यांक आठ दिसां उपरांत कशी जाग आयली हें आमी लोकां मुखार रोखडेच हाडटले, अशें आरजीपीचे फुडारी लिसीयो रोन्कोन हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
