‘टीसीपी’च्या प्रस्नां वयल्यान पेटलें

भांगरभूंय | प्रतिनिधी

मंत्र्याची जाप दिवपाक न्हयकार

प्रस्नांचे विशय न्यायालयांत आशिल्ल्याचें रझांव

विधानसभा 10 मिणटां स्थगीत

भांगरभूंय । प्रतिनिधी

पणजी : विधानसभा सत्राचो चवथो दीस लेगीत कोफुसांवांत सुरू जालो. विशय न्यायालयांत आशिल्ल्याचें सांगून नगर‌ नियोजन (टीसीपी) मंत्री विश्वजीत राणे हांणी प्रस्नांक जाप दिवपाक न्हयकार दिल्ल्यान विरोधकांनी सभापती आसना मुखा वयल्या हौदांत वचून बोवाळ केलो. ह्या बोवाळाक लागून विधानसभा 10 मिणटां खातीर स्थगीत जाली.

सत्राचे सुरवेकूच नगर नियोजन मंत्री विश्वजीत राणे हांणी नगर नियोजन खात्याक विचारिल्ल्या प्रस्नांचे विशय न्यायालयांत प्रलंबीत आसात. हे खातीर विधानसभेचे नेम आनी नियमना प्रमाण ह्या प्रस्नांक जाप दिवपाक मेळना, अशें रझांव दिलें. पूण रेव्ह्युलेशनरी पक्षाचे आमदार विरेश बोरकार हांणी बोवाळ घालपाक सुरवात केली. टीसीपी 39 अ चो विशय न्यायालयांत प्रलंबीत आसा अशें सांगून तारांकीत आनी अतारांकीत सगल्या प्रस्नांक जापो दिवपाक मंत्र्यान न्हयकार दिलो.

39 अ हें प्रकरण न्यायालयांत प्रलंबीत आसा. पूण 39 अ चो कसलोच संबंद टीसीपी बोर्डा कडेन येना. हे खातीर मंत्री ही जाप कित्याक दिवपाक सोदिना? म्हाका फक्त टीसीपी बोर्डांत वांगडी कोण आसात आनी तांणी कसले निर्णय घेतल्यात हाचीच जाप जाय. टीसपी बोर्ड हें न्यायप्रविश्ठ ना, असो युक्तिवाद बोरकार हांणी केलो.

म्हादय हो विशय लेगीत न्यायप्रविश्ठ आसा तरी लेगीत काल ह्या विशयाचेर सभाघरांत सविस्तर चर्चा जाली. आमी लोकप्रतिनिधी आसात. ते खातीर न्यायप्रविश्ठ आशिल्ल्या विशयांचेर चर्चा करपाक कसली हरकत आसा, असो प्रश्न विरोधी पक्ष फुडारी युरी आलेमांव हांणी केलो. नगर नियोजन खातेंच हें न्यायप्रविश्ठ जालां, असो आरोप आलेमांव हांणी केलो.

पूण नगर नियोजन मंत्री आपले भुमिकेर ठाम रावले. विशय न्यायप्रविश्ठ आशिल्ल्यान म्हाका जाप दिवपाक मेळना. जर तुमकां म्हायती जाय जाल्यार ती म्हायती हक्क कायद्या खाला मागयात अशी जाप मंत्र्यान दिली.

मंत्री आरती परती जाप दिता असो आरोप करून विरोधकांनी सभापतीच्या आसना मुखा वयल्या हौदांत धांव घेवन हे विशीं स्पश्टीकरण दिवपाची मागणी केली.

सभापतीन कोफुसांवा मजगतीं विधानसभेचें कामकाज चालूच दवरलें. पूण बोवाळाक लागून कामकाजांत आडखळी येवपाक लागल्यो. उपरांत सभापतीन विधानसभा तहकूब केली. विधानसभेचें कामकाज परतून सुरू जाले उपरांत सभापतीन ह्या विशयाचेर जेवणाचे सुटये उपरांत जाप दिता अशें आस्वासन दिले उपरांत विधानसभेचें कामकाज सुरळीत सुरू जालें.

जेवणाचे सुटये उपरांत कॉलींग अटेंशन सोंपतकत विरेश बोरकार हांणी सभापतीक परतून उगडास करून दिलो आनी नगर नियोजन खात्या विशींच्या प्रस्नाचेर परतून बोवाळ सुरू जालो. उपरांत मुख्यमंत्री डॉ. प्रमोद सावंत हांणी ज्या प्रस्नांच्यो जापो मेळूंक नात, ताची चवकशी करपाचें आस्वासन दिलें. नगर नियोजन खात्या संबंदीत कांय प्रस्नांक जाप मेळूंक ना. ताच्या कारणांची चवकशी करतले. फाल्यां सभापती, मुखेल सचीव, खात्याचे सचीव आनी हांव बसका घेतले, अशें मुख्यमंत्र्यान सांगलें.

विजय सरदेसाय हांणी मारली कूस

सभापतीच्या हौदांत आरजीपी, आम आदमी पक्ष, काँग्रेसीचे मेळून सगले आमदार धांवले. पूण विजय सरदेसाय हांणी कूस मारली. तांणी विरोधकांक तेंको दिवचे परस आपले सुवातेरूच रावप पसंत केलें. विरोध दाखोवपा खातीर सगले विरोधक जमनीर बसून आसले, पूण विजय सरदेसाय आपल्या कदेला वयल्यान उठूंक ना.