भांगरभूंय | प्रतिनिधी
पणजीः टीसीपीच्या कलम ३९ (अ) सकयल २.७० लाख चौ. मी. जमीनीचो झोन बदल्ला. ६२०० अर्ज आयिल्ले तातुंतल्या फकत २०० अर्जांक मार्गदर्शक तत्वांक खरपणान पाळो दिवन मान्यताय दिल्या, अशी म्हायती नगर नियोजन मंत्री विश्वजित राणे हांणी दिली.
कलम ३९ (अ) सकयल गोंयांत आतां मेरेन कितल्या जमीनींचो झोन बदल्ला असो प्रस्न सांत आंद्रेचे आमदार विरेश बोरकार हांणी सभाघरांत प्रस्नोत्तरा वेळार विचारलो.
हे विशीं जाप दितना नगर नियोजन मंत्री विश्वजीत राणे हांणी सांगलें, कलम ३९ (अ) हीं एक उत्कृश्ट यंत्रणां आसात अशें न्यायालयान नमूद केलां.
जितले अर्ज आयल्यात तांचे अजून मेरेन झोन बदलाची निमणी अधिसुचोवणी येवंक ना. नगर नियोजन खात्याकडेन ३९ (अ) सकयल ६९०० अर्ज आयिल्ले. तातुंतल्या २०० अर्जांक मार्गदर्शक तत्वां प्रमाण मान्यताय दिवन २.७० लाख चौ. मी. जमीनीचो झोन बदल्ला, अशी म्हायती मंत्री राणे हांणी दिली.
झोन बदला विशीं आमी पुराय मार्गदर्शक तत्वांक पाळो दिवनच प्रक्रीया करतात. हातूंत कायदो मोडप जायना. जे अर्ज मार्गदर्शक तत्वां आड आसात तांकां कशीच मान्यताय मेळना. जर मार्गदर्शक तत्वां पाळूंक नात जाल्यार ते विशींची विशीश्ट कागाळ दाखल करची, अशें मंत्र्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
