भांगरभूंय | प्रतिनिधी
पणजीः विशय न्याय प्रविश्ठ आसा अशें कारण दिवन नगर नियोजन खात्याच्या ज्या प्रस्नांची जाप दिवंक नाशिल्ली तांची जाप विधानसभेचे सत्र सोंपचे एक दीस पयलीं दितले. तशेंच एका प्रस्नाची जाप फुडल्या विधानसभा सत्रांत दितले अशें सभापती रमेश तवडकार हांणी सभाघरांत सांगलें.
विशय न्याय प्रविश्ठ आशिल्ल्याचें सांगून नगर नियोजन मंत्री विश्वजीत राणे हांणी प्रस्नांक जाप दिवपाक न्हयकार दिल्ल्यान विरोधकांनी सभापतीच्या हौद्यांत वचून बोवाळ घालो. ह्या बोवाळाक लागून विधानसभा 10 मिणटां खातीर स्थगीत जाली. नगर नियोजन खात्या संबंदीत कांय प्रस्नांक जापो मेळूंक नात. ताच्या कारणाची चवकशी करतले. फाल्यां सभापती, मुखेल सचीव, खात्याचे सचीव आनी हांव बसका घेतले अशें आस्वासन मुख्यमंत्री डॉ. प्रमोद सावंत हांणी दिल्लें.
सगल्या तारांकीत आनी अतारांकीत प्रस्नांच्यो जापो 7 ऑगस्टाक दितले. जाल्यार एका तारांकीत प्रस्नाची जाप फुडल्या सत्रांत दितले अशें सभापती रमेश तवडकार हांणी शुक्रारा सांगलें उपरांत विरोधकांच्या आंदोलनांक निमाणें येस मेळ्ळें.
जाप दिवंक नाशिल्ले तारांकीत प्रस्न 1क, 2 अ, 3 ब, 20ब आनी 20 क आनी अतारांकीत प्रस्न 38, 57, 36, 96 आनी 134 हांची जाप 7 ऑगस्ट 2025साक दितले. जाल्यार 3 अ ह्या प्रस्नाची जाप फुडल्या विधानसभा अधिवेशनांत दितले अशी म्हायती सभापती रमेश तवडकार हांणी दिली.
शुक्रार 8 ऑगस्ट हो दीस विधानसभा अधिवेशनाचो निमाणो दिस. हाचे एक दीस पयलीं हे प्रस्न परतून एक फावटी चर्चेक येतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
