भांगरभूंय | प्रतिनिधी
16 कर्मचाऱ्यांक काडले, स वेंडर्सांचेर बंदी
मुंबय, खबरां संस्था ः देशांतलीं सगल्यांत व्हडली आयटी कंपनी टीसीएसन भरती घोटाळ्याचेर व्हड कारवाय केल्या. हे भानगडीचे चवकशी उपरांत कंपनीन १६ कर्मचाऱ्यांक काडल्यात. तशेंच स वेंडर्सांचेर बंदी घाल्या. तांचें धनी आनी तांचे कडेन संबंदीत लोकांक आतां टीसीएसा वांगडा वेवसाय करपाक मेळचोना. कंपनीन हे कारवाय विशीं म्हायती दिली.
वट्ट 19 कर्मचाऱ्यां आड कारवाय
टाटा गटाचे आयटी कंपनीन हे कारवाये विशीं निवेदन जारी केलां. भरती घोटाळ्याची म्हायती मेळ्ळ्या उपरांत ताची पुराय चवकशी केल्या अशें कंपनीन सांगलें. चवकशे वेळार कंपनीचे 19 कर्मचारी भरती घोटाळ्यांत आशिल्ल्याचें दिसून आयलें. तातूंतल्या 16 कर्मचाऱ्यांक कंपनीन काडून उडयले, जाल्यार 3 कर्मचाऱ्यांक संसाधन वेवस्थापन युनिटांतल्यान काडून उडयले.
कर्मचाऱ्यां भायर टीसीएसान कांय विक्रेत्या आडय कारवाय केल्या. कंपनीन 6 विक्रेत्यांक, तांच्या मालकांक आनी तांच्या संबंदीत लोकांक टीसीएस कडेन खंयच्याय संबंदीत वेवसाय करपाक बंदी घाल्या. खरें म्हणल्यार भरती घोटाळ्याची म्हायती उजवाडाक आयली तेन्ना टीसीएसचे कांय विक्रेते आपल्या कांय कर्मचाऱ्यां कडेन मेळून नोकऱ्यांनी फटवणूक करतात अशें उक्तें जालें.
के कृतिवसान हांणी हालींच टीसीएसचे सीईओ म्हणून काम सांबाळ्ळ्या उपरांत अनियमिततायेचो आरोप उजवाडाक आयिल्लो. सीईओ पद घेतले बरोबर तांकां ह्या व्हडल्या आव्हानाक तोंड दिवचें पडलें. जून 2023 वर्सा ही गजाल उजवाडाक आयली आनी त्याच वेळार कंपनीन चवकशी सुरू केली.
चवकशी 4 म्हयने चल्ली
4 म्हयन्यांचे चवकशे उपरांत आतां टीसीएसान कारवाय केल्या. चवकशेंत खंयच्याच मुखेल वेवस्थापकाचो आस्पाव ना, अशें कंपनीन स्पश्ट सांगलें. ही कंपनी कडेन फटवणूक करपाची गजाल न्हय. फुडाराक कॉर्पोरेट गव्हर्नन्सांत आनीक सुदारणा करपा खातीर वावुरतले अशें टीसीएस कंपनीन सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
