टीसपी कायद्यांत बसनाशिल्ल्या प्रकल्पांक आयपीबीची मंजुरी

भांगरभूंय | प्रतिनिधी

काँग्रेसीचे उपाध्यक्ष तुलियो डिसोझा हांचो आरोप

भांगरभूंय । प्रतिनिधी
पणजीः टीसीपी कायद्यांत जे प्रकल्प बसनात तांकां गुंतवणूक प्रोत्साहन मंडळान (आयपीबी) रेयश मागूस गांवांत मंजुरी दिल्या. सरकारान फाटल्या 10 वर्सात आयपीबीन कितले प्रकल्प हाडून राज्यांत कितलो निवेश आनी रोजगार तयार केला हाची म्हायती दिवची, अशी मागणी गोंय प्रदेश काँग्रेसीचे उपाध्यक्ष तुलियो डिसोझा हांणी केला.
पणजे काँग्रेस हावसांत घेतील्ले पत्रकार परिशदेंत तुलियो डिसोझा उलयताले. ह्या वेळार उत्तर गोंय काँग्रेसीचे अध्यक्ष विरेंन्द्र शिरोडकार आनी हेर पदाधिकारी हाजीर आशिल्लें.
रेयश मागूस एक स्पा, एक 5 स्टार, 4 स्टार हॉटेल आनी मल्टी स्टोरी पार्किंग लोट येवपाचे आसात आनी ह्या प्रकल्पाचे सगळे भागधारक दिल्लीचे आसा अशें आयपीबीन म्हायती हक्क खाला विचारिल्ल्या प्रश्नाक जाप दिल्या. जे प्रकल्प टीसीपी कायद्या खाला मान्य जायनात तांकां आयपीबीतल्यान दोंगराचेर आनी शेतांनी मान्यताय मेळटा, असो आरोप तुलियो हांणी केलो.
तशेंच जी सेल डिडां जाल्यांत तातूंत ही सुवात शेत जमीन म्हूण अधोरेखीत आसा. प्रादेशिक आराखडो 2021 प्रमाण ह्या प्रकल्पांचो अर्दो भाग सीआरझेड आनी उरिल्लो भाग एनडीझेड वाठारांत येता. ते भायर ह्या प्रकल्पांक नौदळाच्या बफर झोना कुशीक येता. तरी लेगीत आयपीबीचे अधिकाऱ्यांनी तांकां मान्यताय दिल्या, असोय आरोप तुलीयो हांणी केलो.
फकत लोकांक फटोवपा खातीर सरकारान ह्या प्रकल्पां विशीं जन सुनावणी आपयिल्लीं. पूण सुनावणेचो अहवाल सरकाराक धाडचें पयलींच आयपीबीन ह्या प्रकल्पांक मंजुरी दिवन उडयलीं. जे प्रकल्प टीसीपी कायद्या भायर वतात तांकां वाट मेकळी करून दिवपी एकच पर्याय म्हळ्यार तो आयपीबी, अशी टिका तुलियो हांणी केली.
ह्या प्रकल्पा वरवीं हजार कोटींचो निवेश येतलो आनी हजारांनी रोजगार तयार जातले अशें सरकारा सांगता. देखून सरकारान हे विशीं अहवाल उजवाडाक हाडून 10 वर्सांत आयपीबीच्या दरेकी बसेकेंत कितल्या प्रकल्पांक मान्यताय दिल्या. तशेंच ह्या प्रकल्पांतल्यान कितली गुंतवण जावन, कितलो रोजगार तयार आसा हाची म्हायती दिवची, अशी मागणी तुलियो हांणी केल्या.
आमी गोंयकार ओगी रावचे नात हे प्रकल्प बंद करपाक आमी रस्त्यार येतले, अशी शिटकावणी तुलियो हांणी दिली.