भांगरभूंय | प्रतिनिधी
भारतान विक्रमी णववे खेपे 19 वर्सां पिराये सकयले संवसारीक क्रिकेट सर्तीचे फायनलींत सुवात मेळयली. काल जाल्ले पयले सेमी फायनलींत ताणें येजमान दक्षीण आफ्रिका पंगडाक 2 विकेटींनी हारयलो. भारतान 48.5 ओव्हरींनी 8 विकेटी वगडावन मोख मेळयली. पांच खेपेचो वस्ताद भारताचो पंगड पाकिस्तान वा ऑस्ट्रेलिया पंगडा आड खेळटलो. पाकिस्तान आनी ऑस्ट्रेलिया ह्या पंगडां मदली दुसरी सेमी फायनल फाल्यां जातली.
सर्तींत सेगीत पांच मॅची जिखून सेमी फायनलींत सुवात मेळोवपी भारतान टॉस जिखून पयलीं फिल्डिंग करपाचो निर्णय घेतलो. दक्षीण आफ्रिकेन निर्धारीत 50 ओव्हरींनी 7 विकेटी वगडावन 244 धांवड्यो केल्यो.
2014चो वस्ताद दक्षीण आफ्रिका अंदूंचे सर्तींत भारता आड 200 परस चड धांवड्यो करपी पयलो पंगड थारलो. मजगतीं, धांवड्यांचो फाटलाव करपी भारतान एका वेळार 32 धांवड्यांचेर म्हत्वाच्यो 4 विकेटी वगडायिल्ल्यो.
आदर्श सिंग पयल्याच बॉलाचेर शुन्याचेर बाद जालो. ते उपरांत मुशीर खान चार धांवड्यो करून तंबूंत परतलो. अर्शीन कुलकर्णी 12 धांवड्यो करून बाद जालो. जाल्यार प्रियांशू मोलियाक पांच धांवड्यो करप शक्य जाल्यो. भारताचेर हारीचें सांवट पातळिल्लें. हांगाच्यान सचिन दास (96) आनी मुखेली उदय सहारण (81) हांणी म्हत्वाची खेळी करून भारताक मोखीच्या लागसार व्हेलो. दोगांयनी पांचवे विकेटी खातीर विक्रमी 171 धांवड्यांची भागिदारी केली. हीच भागिदारी अखेरेक भारताच्या जैताचो टर्नींग पॉयण्ट थारलो.
सचिनान 95 बॉलांनी 96 धांवड्यो केल्यो. ताणें 11 चवके आनी एक सको मारलो. उदयान 124 बॉलांनी 81 धांवड्यो केल्यो. हातूंत स चवक्यांचो आस्पाव आशिल्लो.
राज लिंबानीन अखेरचे ओव्हरींत चार बॉलांनी 13 धांवड्यो करून मॅच सोंपयली. ताणें एक चवको आनी एक सको मारलो.
ते पयलीं दक्षीण आफ्रिके वतीन विकेटकीपर बॅट्समन हुआन ड्रे प्रिटोरियसान 102 बॉलांनी 76 आनी रिचर्ड सेलेट्सवेनान 100 बॉलांनी 64 धांवड्यांची खेळी केल्ली. पूण, आपल्या पंगडाक व्हड धांवसंख्या उबारून दिवपाक तांकां अपेस आयलें.
भारतान बेनोनीच्या विलोमूर पार्कांत भारताच्या बॉलरांनी सुरवाती सावन आफ्रिकेचेर आपलो शेक दवरिल्लो.पूण अखेरच्या ओव्हरींनी वेगान धांवड्यो करून 244 मेरेन पावपाक आफ्रिकेक येस आयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
