भांगरभूंय | प्रतिनिधी
आशियायी करंड सर्तींत फकत एकेच मॅचींत आमी बाबत खेळ केलो आनी वस्तादपण चुकलें. पूण, तातूंतल्यान आमकां आमच्यो चुकी समजल्यो. तातूंत आतां सुदारणां केल्या आनी आमी संवसारीक क्रिकेट सर्ती खातीर सज्ज जाल्यात असो विस्वास मुखेली हरमनप्रीत कौरान उक्तायलो.
संयुक्त अरब अमिरातांत फुडल्या म्हयन्याचे सुरवाती सावन बायलांची संवसारीक टी-20 क्रिकेट सर्त सुरू जातली. ते खातीर काल बीसीसीयआच्या मुखेल कचेरेंत पत्रकार परिशदेंत जाली. हातूंत हरमनप्रीत कौर, मुखेल प्रशिक्षक अमोल मुझुमदार आनी निवड समितीची अध्यक्ष नीतू डॅव्हिड उपस्थीत आशिल्लीं.
श्रीलंकेंत जाल्ले आशियायी करंड सर्तींत आमी उत्कृश्ट खेळ केल्लो. पूण, फायनलींत अपेक्षे प्रमाण खेळ करपाक जमलो ना अशें हरमनप्रीत हिणें सांगलें.
अमोल मुझुमदारान हो मुद्दो आनीक स्पश्ट करतना सांगलें, संवसारीक टी-20 क्रिकेट सर्तीचे तयारी खातीर जाल्ले सराव शिबिरांत आमी ह्या उणांवांचेर मार्ग सोदला. बंगळुरूंतल्या राष्ट्रीय क्रिकेट अकादमींतल्या शिबिरांत आमी तंदुरुस्ती आनी फिल्डिंगेचेरूय भर दिला. ते उपरांत सरावाच्यो मॅची खेळ्ळे. संवसारीक सर्ती खातीर आमी सज्ज आसात अशें तांणें मुखार म्हणलें.
गुणवत्ता आनी क्षमतेचे बाबतींत आमच्यो खेळगडयो उण्यो नात. पूण, म्हत्वाच्या खिणाक मानसीकताय चड सक्षम करपाची गरज आसा हें आमचे लक्षांत आयलें. ताका लागून आमी सराव शिबिरांत खेळां मानसोपचारतज्ञ मुग्धा बर्वे हांची नेमणूक केली. संवसारीक सर्तींत कसलोच उणाव उरचो न्हय म्हणून आमी खर यत्न करीत आसात अशें मुझुमदारान मुखार सांगलें.
आदीं थारायिल्ले कार्यावळी प्रमाण संवसारीक टी-20 सर्त बांगलादेशांत जावपाची आशिल्ली आनी ते दिश्टीन आदीं तयारी केल्ली. पूण, बांगलादेशांतले परिस्थितीक लागून सर्त युएईंत स्थलांतरीत करची पडली. आशिया खंडांतूच सर्त जावपाची आशिल्ल्यान तसो व्हड फरक पडचो ना. अमिरातांत सध्या गरमी आसा. आमकां दुबय तीन आनी शारजांत एक मॅच खेळपाची आसा. थंय गेल्या उपरांत हवामान आनी खेळपट्ट्यां प्रमाण पंगडाची रचना तयार करतले अशें मुझुमदारान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
