टीम इंडिया बॅकफुटार

भांगरभूंय | प्रतिनिधी

येजमान इंग्लंडान भारता आड चालू आशिल्ले मॅन्चॅस्टर टॅस्टींतली आपली स्थिती घटमूट केल्या. काल तिसऱ्या दिसा ताणें 186 धांवड्यांची म्हत्वाची आघाडी घेतल्या. तिसऱ्या दिसाचो खेळ सोंपलो त्या वेळार इंग्लंडान आपल्या पयल्या डावांत 7 विकेटी व्हगडावन 544 धांवड्यो केल्यात.

मुखेली बेन स्टोक्स 77 आनी लियम डॉसन 21 धांवड्यांचेर खेळटात. आदलो मुखेली जो रुटान 150 धांवड्यांची खेळी केली. ताणें पयलीं ओली पोप (71) हाच्या वांगडा 144 धांवड्यांची आनी बेन स्टोक्सा वांगडा 142 धांवड्यांची भागिदारी केली.

भारता वतीन वॉशिंग्टन सुंदर आनी रवींद्र जडेजा हांणी 2-2 विकेटी घेतल्यो. जसप्रीत बुमरा, मोहम्मद सिराज आनी अंशुल कम्बोज हांणी एकेक विकेट मेळयली. भारताचो पयलो डाव 358 धांवड्यांचेर सोंपलो.

रुटान घालो रिकी पॉण्टिंगाक फाटीं

इंग्लंडाचो आदलो मुखेली जो रुट सध्या जबरदस्त फॉर्मांत आसा. टॅस्ट क्रिकेटींत सगल्यांत चड धांवड्यो करपाचे वळेरेंत तो दुसरे सुवातेर पावलो. 121 धांवड्यो करिना फुडें ताणें ऑस्ट्रेलियेचो आदलो बॅट्समन रिकी पॉण्टिंगाक फाटीं घालो.

रुटान 157वे टॅस्टींत 13380चेर पावलो. ताणें काल राहुल द्रविड (164 टॅस्टींतल्यान 13288), जॅक्स कॅलिस (166 टॅस्टींतल्यान 13289) आनी रिकी पॉण्टिंगाक (168 टॅस्टींतल्यान 13378) हांकां फाटीं घाले. ताच्या मुखार आतां फकत सचिन तेंडुलकर आसा. तेंडुलकरान 200 टॅस्टींनी खेळटना 15921 धांवड्यो केल्यात.