भांगरभूंय | प्रतिनिधी
भारताच्या बायलांच्या क्रिकेट पंगडान राष्ट्रकूल खेळां सर्तींत इतिहास घडयलो. भारतान सेमी फायनलींत येजमान इंग्लंडाक 4 धांवड्यांनी हारोवन फायनलींत सुवात मेळयली.
राष्ट्रकूल खेळां सर्तींत पयले खेपे बायलांचे क्रिकेटीचो आस्पाव केला आनी पयल्याच यत्नांत भारत फायनलींत पावलो.
भारतान टॉस जिखून पयलीं बॅटींग करपाचो निर्णय घेतलो आनी निर्धारीत 20 ओव्हरींनी 5 विकेटी वगडावन 164 धांवड्यो केल्यो. स्मृती मंधानान 32 बॉलांनी 61 धांवड्यांची खेळी केली. जेमिमा रॉड्रिग्सान 31 बॉलांनी नाबाद 44 धांवड्यांचें योगदान दिलें.
मोखीचो फाटलाव करपी इंग्लंडाक 20 ओव्हरींनी 6 विकेटी वगडावन 160 धांवड्यो करप शक्य जाल्यो. मुखेली नॅट शिवरान 41 धांवड्यो केल्यो. भारता वतीन स्नेह राणान सगल्यांत चड दोन विकेटी घेतल्यो.
निमाणे ओव्हरींत इंग्लंडाक जैता खातीर 15 धांवड्यांची गरज आशिल्ली. पूण, स्नेह राणान उत्कृश्ठ बॉलींग करून इंग्लंडाक गरजेच्यो धांवड्यो करपाक दिल्यो ना.
ते पयलीं भारतान टॉस जिखून पयलीं बॅटींग करपाचो निर्णय घेतलो. आपल्या मुखेल्याचो निर्णय योग्य थारायतना स्मृती मंधानान जबरदस्त बॅटींग करून पंगडाक बरी सुरवात करून दिली. तिणें आठ चवके आनी तीन सक्यांचे मजतीन फक्त 23 बॉलांनी अर्द शेंकडो पुर्ण केलो. भारतान सुरवाती पसून इंग्लंडाच्या बॉलरांचेर आपलो शेक दवरलो. पूण, मंधाना बाद जाल्या उपरांत भारताचो डाव विस्कटलो. मंधाना खेरीत जेमिमान नाबाद 44 धांवड्यांचें योगदान दिलें.
राष्ट्रकूल खेळां सर्तींतले पयले मॅचींत भारताक ऑस्ट्रेलिये कडल्यान हार घेवची पडिल्ली. ते उपरांत पाकिस्तानाक हारयलो. ते उपरांत तिसरे मॅचींत बारबाडोसा आड व्हड जैत जोडून भारतान सेमी फायनलींत सुवात मेळयली.
1998 उपरांत अंदूं पयले खेपे राष्ट्रकूलांत क्रिकेटीचें पुनरागमन जालां. त्या वेळार त्या वेळार टी-20 प्रकार नाशिल्लो. 1998त सचिन तेंडुलकर, अनील कुंबळे, अजय जडेजा ह्या दिग्गजांचो भारताच्या दादल्यांच्या पंगडांत आस्पाव आशिल्लो. पूण, तांकां पदक जिखपाक जमलें ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
