भांगरभूंय | प्रतिनिधी
भारत आनी इंग्लंड ह्या पंगडां मदीं हांगाच्या इतिहासीक लॉर्ड्स मैदानाचेर माळेंतली तिसरी टॅस्ट मॅच आयच्यान सुरू जातली. ही मॅच जिखून माळेंत आघाडी घेवपाची दोनूय पंगडांक संद आसा.
हेडिंग्लेंत जाल्ले पयले मॅचींत भारताक हार घेवची पडिल्ली. पूण, अॅजबॅस्टनांत भारतान जबरदस्त पुनरागमन करीत इंग्लंडा व्हडा फरकान हारोवन आपलो आत्मविस्वास वाडयलो. आतां बेन स्टोक्सच्या फुडारपणाखाला खेळपी इंग्लंड पुनरागमन करपाक कसली रणनिती आपणायतलो हें पळोवपा सारकें आसा.
दुसरे टॅस्टी खातीर विसव दिल्या उपरांत फास्ट बॉलर जसप्रीत बुमरा आयचे मॅचींत खेळटलो काय ना हाचेर सगल्यांची नदर आसतली. जर बुमरा खेळटा तर खंयच्या बॉलराक भायर बसयतले हें लेगीत पळोवचें पडटलें. मोहम्मद सिराज आनी आकाशदीप ह्या फास्ट बॉलरांनी फाटले मॅचींत जबरदस्त प्रदर्शन केल्लें. प्रसिद्द कृष्णाचो फॉर्म निश्चीत रितीन हुस्क्याचो विशय आसा. दुसरे टॅस्टीच्या पयल्या डावांत ताका एकूय विकेट मेळूंक नाशिल्ली. जाल्यार दुसऱ्या डावांत एक विकेट घेतिल्ली.
बुमरा खेरीत, भारतान फाटले मॅचींत आनीक दोन बदल केल्ले. शार्दुल ठाकूर आनी साई सुदर्शन हांकां भायर बसोवन तांचे सुवातेर नितीश कुमार रेड्डी आनी वॉशिंग्टन सुंदर हांकां निमाण्या इकरांत सुवात दिल्ली. रेड्डी बरी कामगिरी करपाक जमूंक नाशिल्ली. ताका बॅटींग आनी बॉलींग दोनूय विभागांत अपेस आयिल्लें.
इंग्लंडान तिसरे मॅची खातीर फास्ट आनी बावन्सी खेळपट्टीची मागणी केल्या. इंग्लंड फास्ट खेळपट्टीची मागणी करपाक शकता अशी शक्यताय भारताचो मुखेली शुभमन गिलान कांय दिसां पयलीं शक्यताय उक्तायिल्ली. खेळपट्टी फास्ट बॉलरांक मजत करपी आसली जाल्यार जोफ्रा आर्चर पुनरागमन करपाक शकता. इंग्लंडान तिसरे टॅस्टी खातीर ताचो पंगडांत आस्पाव केला.
ब्रॅडमनाक फाटीं घालपाची गिलाक संद
शुभमन गिल इतिहास घडोवपाच्या हुमऱ्यार आसा. दोन टॅस्टींनी तीन शेंकडे मारून ताणें 585 धांवड्यो केल्यात. उरिल्ल्या तीन टॅस्टींनी मेळून 390 धांवड्यो करता जाल्यार तो एके माळेंत सगल्यांत चड धांवड्यो करपी बॅट्समन थारतलो. सध्या ऑस्ट्रेलियेचो आदलो म्हान बॅट्समन डॉन ब्रॅडमनाच्या नांवार हो विक्रम आसा. ताणें 95 वर्सां पयलीं म्हणल्यार 1930त ब्रॅडमनान 974 धांवड्यो केल्ल्यो.
भारतीय विक्रमा विशीं सांगचें जाल्यार हो विक्रम सुनील गावस्कराच्या नांवार आसा. ताणें 1978त वॅस्ट इंडिजा आड 732 धांवड्यो केल्ल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
