भांगरभूंय | प्रतिनिधी
येजमान भारत पंगडान अफगाणिस्ताना आडची तिसरी आनी निमाणी टी-20 मॅच जिखून 3-0 अशें क्लीन स्वीप केलें. भारतान मॅच दुसरे सुपर ओव्हरींत जिखली.
ते पयलीं टॉस जिखून पयलीं बॅटींग करपाचो निर्णय घेवपी भारतान निर्धारीत 20 ओव्हरींनी 4 विकेटी वगडावन 212 धांवड्यो केल्यो. मोखीचो फाटलाव करतना अफगाणिस्तानान 20 ओव्हरींनी 6 विकेटी वगडावन 212 धांवड्यो केल्यो आनी मॅच टाय जाली.
पयले सुपर ओव्हरींत अफगाणिस्तानान पयलीं बॅटींग करून भारताक 17 धांवड्यांची मोख दिली. पूण, भारताक 16 धांवड्यो करप शक्य जाल्यो अशे तरेन पयली सुपर ओव्हर टाय उरली.
सुपर ओव्हरीच्या पयल्या बॉलाचेर गुलबदीन नईब धांवबाद जालो. ते उपरांत मोहम्मद नबी आनी गुरबान नईम हांणी 16 धांवड्यो केल्यो. मोखीचो फाटलाव करपी भारताक रोहित शर्मान पयली धांवडी बाय वरवीं करून दिली. ते उपरांत दुसऱ्या बॉलाचेर यशस्वी जयस्वालान एक धांवडी करून रोहीत शर्माक संद दिली. ते उपरांत रोहीतान दोन सके मारले आनी मॅच 2 बॉल 3 धांवड्यो अशी केली. पांचव्या बॉलाचेर रोहीताक एक धांवडी मेळ्ळी. यशस्वीक 1 बॉलान 2 धांवड्यो करपाची गरज आशिल्ली. रोहीतान स्वताक रिटायर्ड हर्ट करून रिंकू सिंगाक मैदानांत धाडलो. पूण, निमाण्या बॉलाचेर एकूच धांवडी आयिल्ल्यान निकाल थारावपाक परतून सुपर ओव्हर खेळोवची पडली.
दुसरे सुपर ओव्हरींत रोहीतान भारताक 6,4,1 अशी बरी सुरवात करून दिली. रिंकू सिंग चवथ्या बॉलाचेर कॅच बाद जालो. ते उपरांत संजू सॅमसन मैदानांत आयलो. ताका शॉर्ट चुकलो आनी दुसरे वटेन आशिल्लो रोहीत धांवडी घेवपाक धांवलो. विकेटकीपरान अचूक नेम सादून रोहीताक (11) धांवबाद केलो. दोन विकेटी पडिल्ल्यान अफगाणिस्तानाक जैता खातीर 12 धांवड्यांची मोख मेळ्ळी.
भारता वतीन रवी बिश्नोईन ओव्हर घाली. ताणें पयल्याच बॉलाचेर मोहम्मद नबीक बाद केलो. तिसऱ्या बॉलाचेर रवीन गुरबाजाक बाद करून भारताचें जैत निश्चीत केलें.
कांय म्हयन्यांनी संवसारीक टी-20 सर्त जावपाची आसा. ते पयलीं भारताची ही निमाणी टी-20 माळ आसा.
ते पयलीं 213 धांवड्यांचो फाटलाव करपी अफगाणिस्तानाक निमाणे ओव्हरींत 19 धांवड्यांची गरज आशिल्ली. मुकेश कुमारान निमाणी ओव्हर घाली. पयल्या बॉलाचेर चवको आयलो. दुसऱ्या बॉलाचेर एकूय धांवडी येवंक ना. तिसरो बॉल वायड थारलो. तिसऱ्या बॉलाचेर दोन धांवड्यो आयल्यो. चवथ्या बॉलाचेर गुलबदीनान सको मारलो. निमाण्या दोन बॉलांचेर 2-2 धांवड्यो आयल्यो.
ते आदीं टॉस जिखून पयलीं बॅटींग करपी भारताची स्थिती बिकट जाल्ली. अशा वेळार मुखेली रोहीत शर्मा आनी रिंकू सिंगान जबरदस्त बॅटींग करून भारताक दोनश्यांचो पांवडो हुपून दिलो.
रोहीतान आंतरराष्ट्रीय टी-20तलो आपलो पांचवो शेंकडो नोंदयलो. ताणें 64 बॉलांनी शेंकडो पुर्ण केलो. तशेंच रिंकू वांगडा मेळून 190 धांवड्यांची भागिदारी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
