भांगरभूंय | प्रतिनिधी
वन डे माळ जिखून 48 वरां जाता थंय आसा भारत पांच टी-20 मॅचींचे माळेतली पयली मॅच खेळपाक सज्ज आसा. वॅस्ट इंडीजा आड भारताच्या युवा खेळगड्यांक आपली प्रतिभा सिद्ध करपाची भांगराळी संद फावो जाल्या. टॅस्ट माळ, वन डे माळ जिखल्या उपरांत टी-20 माळेंत लेगीत भारताचेंच दालें जड दिसता.
अश्टतासांच्या हार्दीक पांड्याच्या फुडारपणाखाला खेळपी भारताच्या पंगडांत यशस्वी जयस्वाल, तिलक वर्मा आनी मुकेश कुमार हांचे सारके प्रतिभावंत खेळगडे आसात. इंडियन प्रिमियर लिगेंत केल्ल्या उत्कृश्ट प्रदर्शनाच्या नेटार वर्मा आनी जयस्वाल हांकां पयले खेपे टी-20 पंगडांत खेळपाची संद फावो जाल्या. हाचो पुर्ण फायदो घेवपाक ते इत्सूक आसतले. दुसरे वटेन अजीत आगरकराच्या अध्यक्षपदाखालचे निवड समितीन संजू सॅमसनाचेर भरवंसो उक्तायला. हाचेर विकेटकीपर बॅट्समन सॅमसन तांचो विस्वास सार्थ करपाक इत्सूक आसतलो. रवी बिश्नोईचें पुनरागमन जालां. तो युजवेंद्र चहल, कुलदीप यादव आनी अक्षर पटेल हांच्या वांगडा स्पिन विभाग सांबाळटलो.
पंगडांत सुरवात्या सुवातांचेर इशान किशन, शुभमन गिल आनी जयस्वाल सारके बॅट्समन आसात. मदले फळयेंत हार्दीक पांड्या आनी सुर्यकुमार यादव हे बॅट्समन आसात. तांचे उपस्थितींत मदले फळयेक घटसाण मेळ्ळ्या.
फास्ट बॉलिंगेचो विभाग मुकेश कुमार, अर्शदीप सिंग, उमरान मलिक आनी आवेश खान हे आसात. फुडल्या वर्सा जावपी संवसारीक टी-20 सर्तीक नदरे मुखार दवरून हे बॉलर आपली उपयोगिता सिद्ध करपाक सोदतले.
दुसरे वटेन वन डे माळ हारल्या उपरांत विंडिजाचो आत्मविस्वास उणो जाला आसुये. रोवमॅन पॉवेलाच्या फुडारपणाखाला खेळपी विंडिजाच्या पंगडाक घटसाण हाडपाक शाई होप आनी फास्ट बॉलर ओशाने थॉमस हांकां आपयल्यात.
शाई ओपान आपली निमाणी टी-20 मॅच पोरूं कोलकातांत भारता आड खेळिल्ली, जाल्यार थॉमसान आपली निमाणी टी-20 मॅच डिसेंबर 2021 कराचींत खेळिल्ली.
माळेंतल्यो फुडल्यो दोन मॅची स आनी आठ ऑगस्टाक गयानांत जातल्यो आनी निमाण्यो दोन मॅची 12 आनी 13 ऑगस्टाक अमेरिकेच्या फ्लोरिडा शारांत जातल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
