भांगरभूंय | प्रतिनिधी
दुसऱ्या दिसाच्या तिनूय सत्रांचेर भारतान आपलो शेक दवरलो. हातूंतल्या दोन सत्रांनी लोकेश राहुल आनी यशस्वी जयस्वाल हे ओपनरांचे जोडयेन ऑस्ट्रेलियेच्या बॉलरांचेर आपलो शेक दवरलो. राहुल आनी यशस्वी हांच्या नाबाद अर्द शेंकड्यां नेटार भारत हांगा चालू आशिल्ले दुसरे टॅस्टींत बरे स्थितींत पावलो. दुसऱ्या दिसाचो खेळ सोंपलो त्या वेळार भारतान आपल्या दुसऱ्या डावांत बिनबाद 172 धांवड्यो केल्ल्यो. अशे तरेन ताणें मॅचींत वट्ट 218 धांवड्यांची आघाडी घेतल्या.
राहुल आनी यशस्वी हांणी भारताक बरी सुरवात करून दिवपा सयत नियंत्रणान डाव मुखार व्हेले. राहुलान ऑफ स्टम्पा भायले बॉल सोडले, यशस्वीन लेगीत चड धोके घेवंक ना. पूण, मिचेल स्टार्कान यशस्वी बाद करपाची एक संद तयार केल्ली. पूण, त्या वेळार उस्मान ख्वाजा योग्य वेळार बॉला पोंदा आयलो ना. 42वे ओव्हरींत नॅथन लायनाचे बॉलिंगेचेर राहुल धांवबाद जावपा पसून वाटावलो. ह्यो दोन घडणुको सोडलो जाल्यार ऑस्ट्रेलियेच्या खेळगड्यांक व्हड संद मेळूंक ना.
कालच्या दिसा ऑस्ट्रेलिये खातीर एक सकारात्मक घडली ती म्हणल्यार मिचेल स्टार्क आनी जोश हेझलवूड हांणी पंगडाचो स्कोर शंबरा वयर पावयलो.
राहुल आनी यशस्वी हांणी पयल्या डावांत भारतान काडिल्ल्या धांवड्यां परस व्हड भागिदारी केली. राहुल आनी यशस्वी ही 2004 उपरांत ऑस्ट्रेलियेंत टॅस्टींत शेंकड्याची भागिदारी करपी पयली भारतीय ओपनरांची जोडी थारली. तांचे पयलीं वीरेंद्र सेहवाग आनी आकाश चोपडा हांणी सिडनींत 123 धांवड्यांची भागिदारी केल्ली.
राहुलान काल पॅडा फाटल्यान आपलें बॅट दवरून बॉल सोडले. ताका लागून ऑस्ट्रेलियेच्या बॉलरांक विकेटी फाटल्यान कॅच बाद करपाक अपेस आयलें. दुसरे वटेन यशस्वीन राहुला परस चड बॉलांक तोंड दिलें आनी ताणें राहुला पयलीं आपलो अर्द शेंकडो पुर्ण केलो. अर्द शेंकडो पुर्ण केल्या उपरांत ताणें आपलें गियर बदल्लें आनी लायनाचे बॉलिंगेचेर स्टेप आवट करून खेळपाक लेगीत तो फाटींफुडे जालो ना. सको मारून एका कॅलेण्डर वर्सांत सगल्यांत चड सके मारपी बॅट्समन थारलो.
यशस्वीची बॅटींग नियंत्रीत आशिल्ली. पूण, अदींमदीं ड्रायव्ह मारतालो. ताका लागून स्लिपांत एक कॅचीची संद लेगीत निर्माण जाल्ली. ताणें सात चवके आनी दोन सके मारले.
मजगतीं, ऑस्ट्रेलिया पंगडान काल 7 बाद 67 धांवड्यां वयल्यान मुखार खेळपाक सुरवात केली. दुसरे ओव्हरीच्या पयल्या बॉलाचेर जसप्रती बुमरान एलेक्स कॅरीक बाद करून ऑस्ट्रेलियेक आठवो धपको दिलो. हे विकेटी वरवीं बुमरान डावांतल्यो पांच विकेटी पुर्ण केल्यो.
लायनाच्या रुपान 79 धांवड्यांचेर णववी विकेट पडली. पूण, ते उपरांत स्टार्कान एक बाजू सांबाळून धरली. ताणें 100 बॉलांक तोंड दिलें. निमाणी विकेट घेवपा खातीर मुखेली बुमरान नितीश कुमार रेड्डी आनी वॉशिंग्टन सुंदर हांचो लेगीत उपेग केलो. पूण, अखेरेक हर्षित राणान स्टार्काक बाद करून ऑस्ट्रेलियेचो पयलो डाव सोंपयलो. ऑस्ट्रेलियेचो घरच्या मैदाना वयलो हो तिसरो उणो स्कोर थारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
