भांगरभूंय | प्रतिनिधी
चवथी टी-20 मॅच व्हडा फरकान जिखून भारतान पांच मॅचींचे माळेंत 3-1 अशी निर्णायक आघाडी घेतली. झिम्बाब्वेन दिल्ले 153 धांवड्यांचे मोखीचो फाटलाव करतना ओपनरांनीच भारताक जिखून दिलें. यशस्वी जयस्वाल आनी मुखेली शुभमन गील हांणी आक्रमक बॅटींग केली. तांचे खेळीन भारतान फकत 15.2 ओव्हरींनी 10 विकेटी आनी 28 बॉल लाखून जैत जोडलें.
यशस्वी आनी शुभमन हे जोडयेन मोखीचो सहज फाटलाव केलो. यशस्वीन 2 सके आनी 13 चवक्यांचे मजतीन 53 बॉलांनी नाबाद 93 धांवड्यो केल्यो. जाल्यार शुभमनान दोन सके आनी स चवक्यांचे मजतीन 39 बॉलांनी नाबाद 58 धांवड्यो केल्यो.
ते पयलीं शुभमनान टॉस जिखून झिम्बाब्वेक बॅटींग करपाचें आमंत्रण दिलें. सुरवात बरी जाली. पूण, ओपनर तंबूंत परतल्या उपरांत झिम्बाब्वेच्या डावाक ब्रेक लागलो. तांच्या ओपनरांनी पयले विकेटी खातीर 63 धांवड्यांची भागिदारी केली. उपरांत भारताच्या बॉलरांनी पुनरागमन केलें. झिम्बाब्वेचो मुखेली सिकंदर रजान सगल्यांत चड धांवड्यो करून आपल्या पंगडाची धांवसंख्या 150च्या मुखार व्हेली. भारता वतीन पदार्पण करपी तुषार देशपांडेन रजाक बाद केलो. अखेरेक झिम्बाब्वेन 20 ओव्हरींनी 7 विकेटी व्हगडावन 152 धांवड्यो केल्यो. रजान 28 बॉलांनी 46 धांवड्यो केल्यो. हातूंत तीन सके आनी दोन चवक्यांचो आस्पाव आशिल्लो. ताचे खेरीत वॅस्ली मधवेरेन 25 आनी तदिवनाशे मारुमणीन 32 धांवड्यांचें योगदान दिलें.
भारता वतीन खलील अहमदान 2 जाल्यार तुषार देशपांडे, वॉशिंग्टन सुंदर, अभिषेक शर्मा आनी शिवम दुबे हाणें दरेकी एक विकेट घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
