भांगरभूंय | प्रतिनिधी
भारत आनी इंग्लंड ह्या पंगडां मदीं कालच्या ऑल्ड ट्रॅफर्ड मैदानाचेर माळेंतले चवथे टॅस्टीक सुरवात जाली. उण्या उजवाडाक लागून पयल्या दिसाचो खेळ थांबयलो त्या वेळार भारतान 4 विकेटी व्हगडावन 264 धांवड्यो केल्ल्यो. शार्दुल ठाकूर आनी रवींद्र जडेजा 19-19 धांवड्यो करून खेळपट्टीचेर आशिल्ले.
पयल्या सत्रांत बरी सुरवात आनी दुसऱ्या सत्रांत इंग्लंडाच्या पुनरागमना उपरांत साई सुदर्शन आनी ऋषभ पंत हांणी 72 धांवड्यांची भागिदारी करून भारताचो डाव सांबाळ्ळो. पूण, क्रिस वोक्साच्या बॉलाचेर पांयाक दुखापत जाल्ल्यान पंताक रिटायर्ड हर्ट जावचें पडलें.
साई सुदर्शनान आपले टॅस्ट कारकिर्दींतलो पयलो अर्द शेंकडो पूर्ण केलो. पूण, यशस्वी जयस्वाला प्रमाण तो लेगीत आपल्या अर्द शेंकड्याचें रुपांतर व्हड खेळींत बदलपाक अपेशी थारलो. शॉर्ट बॉलाचेर पूल खेळपाच्या यत्नांत बेन स्टोक्साक विकेट दिली.
पंत रिटायर्ड हर्ट जाल्या उपरांत रवींद्र जडेजा आनी शार्दुल ठाकूर हांणी भारताचो डाव सांबाळपाक सुरवात केली. खेळ जस जसो मुखार वचपाक लागलो तस तसो उण्या उजवाडाची समस्या बॅट्समनांक जावपाक लागली. पयल्या दिसा चडसो वगत ढगाळ वातावरण आशिल्लें. अखेरेक उण्या उजवाडाक लागून खेळ बेगीन थांबोवचो पडलो.
ते आदीं इंग्लंडान माळेंत सेगीत चवथे खेपे टॉस जिखून भारताक पयलीं बॅटींग करपाचें आमंत्रण दिलें. लोकेश राहुल आनी जयस्वाल हांणी खेळाचें पयलें वर येसस्वी रितीन खेळून काडलें. भारतान पयल्या सत्रांत बिनबाद 78 धांवड्यो केल्ल्यो. पूण, दुसऱ्या सत्रांत इंग्लंडान पुनरागमन केलें.
दुसऱ्या सत्रांत वोक्साच्या बॉलाचेर राहुल बाद जालो, जाल्यार आठ वर्सांनी पुनरागमन करपी लियम डॉसनान जयस्वालाक तंबूंत धाडलो. स्लिपांत उबोर आशिल्ल्या हॅरी ब्रुकान ताची कॅच धरली. अशे तरेन व्हड खेळी करपाची संद ताणें व्हगडायली.
मुखेली शुभमन गिल स्टोक्साचो बॉल सोडपाच्या यत्नांत एलबीडब्ल्यू बाद जालो. भारतान दुसऱ्या सत्रांत 71 धांवड्यो केल्यो. पूण, म्हत्वाच्यो तीन विकेटी व्हगडायल्यो. तिसऱ्या सत्रांत सगली जापसालदारकी पंत आनी साई हांचेर आशिल्ली आनी दोगांयनी जापसालदारकेन बॅटींग केली. अखेरेक 72 धांवड्यांचे भागिदारी उपरांत पंत रिटायर्ट हर्ट जाल्ल्यान इंग्लंडाक परतून खेळाचेर पकड मेळोवपाची संद मेळ्ळी. दुसऱ्या दिसाचो खेळ चड प्रमाणांत पंताचे दुखापतीचेर निंबून आसतलो. धांवतकट्याचेर सध्या चार गडी बाद जाल्ले जाल्ल्याचे दिसता आसले तरी पंताची तंदुरुस्ती भारताच्या ह्या डावाची दिशा आनी दशा थारावपाक व्हड भुमिका थारुये.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
