भांगरभूंय | प्रतिनिधी
दक्षीण आफ्रिके आड 28 सप्टेंबरा पसून सुरू जावपी टी-20 माळे खातीर भारतान आपल्या पंगडांत कांय बदल केल्यात. हार्दिका पांड्या आनी दीपक हुड्डा हांचे सुवातेर वळेरेन स्पिनर अश्टतासांचो खेळगडो शाहबाज अहमद आनी बॅट्समन श्रेयस अय्यर हांकां पंगडांत सुवात दिल्या.
फास्ट बॉलर मोहम्मद शमी अजून कोरोनांतल्यान बरो जावंक ना. ताका लागून निवड समितीन ताची हे माळे खातीर निवड करूंक ना. ताचे सुवातेर हे माळे खातीर लेगीत उमेश यादव पंगडांत कायम आसा. जाल्यार अश्टतासांचो खेळगडो दीपक हुड्डाचे फाटीक दुखापत जाल्या.
माळेंतली पयली मॅच 28 सप्टेंबराक तिरुवनंतपुरमांत जातली. हार्दिक पांड्यान ऑस्ट्रेलिये आड हालींच सोंपिल्ले माळेंत जबरदस्त प्रदर्शन केल्लें. ताणें 3 मॅचींनी 190.90चे स्ट्रायक रेटीन 105 धांवड्यो केल्यो. संवसारीक टी-20 सर्ती पयलीं ताका विसव दिवपाक लागून आफ्रिके आडचे माळेंत निवड करूंक ना अशी चर्चा आसा.
दीपक हुड्डाचे दुखापतीन भारताच्या पंगडाचो हुस्को वाडयला. फुडल्या म्हयन्यांत ऑस्ट्रेलियेंत जावपी संवसारीक टी-20 सर्ती खातीर ताची पंगडांत निवड केल्या. ऑस्ट्रेलिये आडचे माळेंत लेगीत ताणें एक लेगीत मॅच खेळूंक नाशिल्ली.
शाहबाज अश्टतासांचो खेळगडो आसा. तो बॅटींग आनी बॉलींग दोनूय विभागांनी बरें प्रदर्शन करता. रवींद्र जडेजा पयलींच संवसारीक टी-20 सर्तींतल्यान भायर आसा. ताका लागून शाहबाज अहमद संद दिवप एक बरो पर्याय आसा. जर हुड्डाक संवसारीक टी-20 सर्त चुकता, जाल्यार ताचे सुवातेर शाहबाजाक संद मेळुये.
पंगड असोः रोहित शर्मा (मुखेली), लोकेश राहुल (उप मुखेली), विराट कोहली, सुर्यकुमार यादव, श्रेयस अय्यर, दिनेश कार्तिक (विकेटकीपर), ऋषभ पंत (विकेटकीपर), आर आश्विन, युजवेंद्र चहल, शाहबाज अहमद, अक्षर पटेल, अर्शदीप सिंग, मोहम्मद शमी, हर्षल पटेल, दीपक चाहर आनी जसप्रीत बुमरा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
