भांगरभूंय | प्रतिनिधी
भांगरभूंय । खबरां मेज
पणजीः टीएनएस-पीजी ओपन टॅनीस सर्तींत काल 14 वर्सा पिराये सकयल्ल्या चलयांनी आपली टॅनीस कुशळताय दाखयली. पणजी जिमखाना हांगा सुरू आशिल्ले हे राज्य मानांकन सर्तींत भव्या भूमकार आनी आहाना कुमारान आपापल्या प्रतिस्पर्ध्याक व्हडल्या फरकान हारयलें. भव्याची सातत्यपुराय सर्व्हिस, फोर्सफूल फोरहँड आनी बऱ्या बचावाच्या खेळाक लागून ताणे लुसिलाक 6-1 अशें हारयलें. जाल्यार अहानान थारावन केल्लो खेळ आनी फोरहँडाक लागून साराक ताणे 6-2 अशें हारयलें.
दादल्यांचे एकोडी गटांत 6 खेळगड्यांनी बिरेस्तारा टीएनएस- पीजी टॅनीस सर्तीच्या सेमी फायनलींत प्रवेश केलो. राजाराम कुंडककारान चेरियन जोसेफाक 7-5 अशें हारयलें. दोट्टींत सूरज सदनाह आनी रावारू दीक्षित हांणी तांचे प्रतिस्पर्धी अनंत कोचर आनी गणेश पै हांचेर 6-0 अशी एकतर्फी मात केली. संतोष गोरावरानूय तन आमोणकाराक 6-2 अशें हारोवन सेमी फायनलींत प्रवेश केलो. नागेश नायकान प्राजत हळर्णकाराक 6-1 अशें सहज हारयलें.
दादल्यांचे दोट्टी सर्तींत बुलू आनी रिचर्डसान सुरज- कुशल जोडयेक 6-2 अशें हारयलें. अॅलन-ओजस्वी जोडयेन पृथ्वी- क्षितीज हे जोडयेचेर हारयलें. मिश्र दोट्टींत बुलून आनी एक फेरी जिखली. ताणे तान्या वांगडा डस्टन- लाराक 6-1 अशें हारयलें. पृथ्वी-अतिकान श्रीराम- स्टानिया जोडयेचेर 6-2 अशें जैत मेळयलें. हे राज्य मानांकन सर्तीत इकरा श्रेणीत सुमार 140 टॅनीस खेळगड्यांनी वांटो घेतला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
