भांगरभूंय | प्रतिनिधी
9 आनी 10 डिसेंबराक जातली परिक्षा
भांगरभूंय । प्रतिनिधी
पणजी : शालान्त मंडळा वतीन जावपी शिक्षक पात्रताय चांचणी खातीर (टीईटी) आतां मेरेन 4539 अर्ज आयल्यात. अर्ज करपा खातीरची निमाणी तारीख ह्याच म्हयन्यांत सोंपल्या.
शालान्त मंडळा वतीन टीईटी परिक्षा 9 डिसेंबर आनी 10 डिसेंबर अशे दोन दीस जातली. पयल्या पेपराक (पेपर 1) 1857 जाल्यार दुसऱ्या पेपराक 2375 उमेदवारांची नोंद जाल्या. दोनूय पेपरांक 307 उमेदवार आसात. शालान्त मंडळाचे अध्यक्ष भगीरथ शेट्ये हांणी ही म्हायती दिली.
पयली ते आठवी मेरेनच्या शिक्षकां खातीर शिक्षक पात्रताय चांचणी पास जावप सक्तीचें आसा. पयली ते पांचवी मेरेन पयलो पेपर जाल्यार सवी ते आठवी मेरेन दुसरो पेपर दिवचो पडटलो. दोनूय पेपरांक लेगीत बसपाची मेकळीक आसा. टीईटीचो पयलो पेपर 9 डिसेंबराक दनपारां 3 ते 5.30 वरां मेरेन जातलो. दुसरो पेपर 10 डिसेंबराक दनपारां 3 ते 5.30 मेरेन जातलो. उत्तर गोंया खातीर सेंट झेवियर उच्च माध्यमीक विद्यालय, म्हापशें आनी दक्षीण गोंया खातीर रोझरी उच्च माध्यमीक विद्यालय, नावेली हीं परिक्षेचीं केंद्रां आसात.
एका पेपरा खातीर 1800 रुपया जाल्यार दोनूय पेपरां खातीर 3 हजार रुपया शुल्क आसा. 150 गुणांचो पेपर आसतलो. सामान्य गटांत पास जावपा खातीर 90 गूण जाल्यार एससी, एसटी, ओबीसी गटांत पास जावपाक 83 गूण गरजेचे आसात. एकदा टीईटी परिक्षा पास जाले उपरांत एकादो मनीस केन्नाय शिक्षक पदा खातीर अर्ज करपाक शकता. तशेंच कितलेय खेपे परिक्षेक बसपाची मेकळीक आसा. राष्ट्रीय शिक्षण धोरण लागू जाल्या उपरांत आठवी मेरेनच्या शिक्षकां खातीर टीईटी परिक्षा पास जावप सक्तीचें आसा. हाका लागून गोंयांत परिक्षेक बसपी उमेदवारांचो आंकडो वाडटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
