टिका करात, पूण सुचोवण्योय कळयात

भांगरभूंय | प्रतिनिधी

डॉ. चंद्रकांत शेट्येः मेणकुरेंच्या माऊली देवळाचें जातलें नुतनीकरण

भांगरभूंय । प्रतिनिधी

दिवचलः उदरगतीचीं कामां करतना टिका करातूच, तेच वांगडा सुचोवण्योय कळयात. जे वरवीं त्यो सुदरपाक मेळटल्यो. मुख्यमंत्री डॉ. प्रमोद सावंत हांच्या आदारान दिवचल मतदारसंघाची सर्वांगी उदरगत करपाचो आपल्यो ध्यास आसा. लोकांच्या सूख- दुख्खांत वांटो घेतना राजकारण हें वेंचणुके पुरतेंच मर्यादीत दवरून हेर वेळार मतदारसंघाचे उदरगती खातीर सगळ्या घटकांक वांगडा घेवन मुखार वता. उदरगती खातीर लोकांनी मजत करची, अशें आमदार डॉ. चंद्रकांत शेट्ये हांणी सांगलें.

गोंय पर्यटन विकास म्हामंडळा वतीन देड कोटी रुपया खर्रच करून मेणकुरेंच्या श्रीदेवी माऊली मंदीर आनी वाठाराचें सोबितीकरण करपाच्या वावराक डॉ. शेट्ये हांचे हस्तुकीं सुरवात जाली. ह्या वेळार ते उलयताले. तांचे वांगडा जिल्हो पंचायत वांगडी प्रदीप रेवोडकार, पंच उमेश शेट्ये, देवस्थानचे अध्यक्ष अनंत परब, गोविंद नायक, विश्वंभर नायक, गोपाळ नायक, नकुल नायक, प्रज्योत नायक, पर्यटन म्हामंडळाचे कार्यकारी अभियंता एमपी बालन, प्रकल्पाचे सल्लागार नारायण साळगांवकार, बांदकाम कंत्राटदार रोहिदास वायंगणकार, दिवचल भाजप मंडळाचे सरचिटणीस डॉ. कौस्तुभ पाटणेकार, देवस्थान म्हाजन मंडळ हाजीर आशिल्ले.

देवीच्या वाठाराचें सोबितीकरण हें आपल्या यत्नांतल्यान न्हय जाल्यार श्री माऊलीचे कृपेन जाता. ते खातीर म्हाजन मंडळाचे खर यत्न आसात, अशें डॉ. शेट्ये हांणी सांगलें.

पशू वैजकी हॉस्पिटल प्रकल्प लेगीत फुडारांत पुराय करतले. 73 कोटी रुपया खर्च करून आमठाणे धरणांत उदक उपचार संयंत्र बसयतले. ताका लागून साळ पुनर्वसन, उसप, मेणकुरे आनी लाटंबार्से वाठारांत कच्चें उदक उपलब्ध जातलें आनी उदकाचो उणाव जावचो ना. मुळगांवां ईएसआय हॉस्पिटलाचें काम लेगीत फुडल्या काळांत पुराय जातलें. लाटंबार्से उद्देगीक वसणुकेक गती मेळची हे खातीर केंद्र सरकारा कडेन उलोवणी चल्ल्या. ते नदरेन काम चालू आसा, अशें डॉ. शेट्ये हांणी सांगलें.

आतां मेरेन जिल्हो पंचायत निधींतल्यान जीं कामां जाल्यांत, ताचें सगळें स्रय आमदार डॉ. चंद्रकांत शेट्ये हांकां दिवचें पडटलें. तांचे वांगडा काम करतना केन्नाच आडखळ येना. उदरगतीचीं कामां  करतना लोकां कडल्यान बरो आदार मेळटा, अशें जिल्हो पंचायत वांगडी प्रदीप रेवोडकार हांणी सांगलें.

देवस्थानाचे अध्यक्ष अनंत परब हांणी येवकार दिलो. तांणी सांगलें, ही संकल्पना दोन वर्सां सावन चालू आसा. ह्या कामाक मंजुरी मेळिल्ल्यान तांणी आमदाराचे उपकार मानले. नांवतकट्याचें अनावरण आनी नाल्ल फोडून श्रीदेवी माऊली मंदीर सोबितीकरण कामाक आमदाराचे हस्तुकीं सुरवात केली. केशव नायक हांणी सुत्रसंचालन केलें आनी उपकार मानले.