भांगरभूंय | प्रतिनिधी
हेर राज्यां प्रमाण आमच्या गोंयांतूय कावलां अड्डे (स्क्रॅपयार्ड) आसात. ताचे विशीं बरेच लोक कागाळी करतात. तातूंत केन्नाय जावपी स्फोट, आवाज, उजो, चोरयेचो म्हाल… हीं आनी हेर बरींच कारणां ह्या विरोधा फाटल्यान आसात. विधानसभेंतूय हो विशय आयलो, तातूंत धपको दिवपी म्हायती आशिल्ली. हातूंतले चडशे कावलां अड्डे खंय, सरकारी यंत्रणेची परवानगी घेतले बगर उबारल्यात, म्हणल्यार बेकायदेशीर!! आनी दुसरी गजाल, हे अड्डे कोमुनिदादीचे जमनीर वा रस्त्या कुशीक थाटल्यात. थंय सरभोंवतणच्या जाग्यांचेर मागीर अतिक्रमण जालां, नवी वस्ती उबी जाल्या, हें वेगळें सांगपाक नाका. ह्या वर्साचे अखेर मेरेन कावलां अड्ड्यांचेर धोरण येतलें. तेन्ना तातूंत लोक म्हणटात ते प्रमाण, खऱ्यांनीच जर बेकायदेशीर गजाली चलतात, जाल्यार त्यो बंद जावंक फावो.
कावलां अड्डो म्हणल्यार बोल्सांत लिपोवन दवरपाची वस्त न्हय. ल्हान- व्हडांचे नदरेक तो दिश्टी पडटा. म्हणटकूच तो उबारपाक परवानगी घेवंक ना, अशें जर सरकार सांगता जाल्यार ती धक्को दिवपी गजाल. कोणेंय येवन हांगा जाय तें करचें, असो हाचो अर्थ जालो ना? कावलां अड्ड्यांच्या धनयां कडेन तितलें धाडस आसचें ना. तांचे फाटल्यान कोणाचो तरी आशिर्वाद आसतलोच. तो कोणाचो तें सरकारी यंत्रणांनी बेगोबेग सोदून काडपाक जाय. सरकारी यंत्रणाच हातूंत घुस्पल्या जाल्यार तेंवूय भायर सरतलें. कावलां अड्डे घालपाक परवानगी घेवंक ना जाल्यार तांकां उदकाचें, लायटीचें कनेक्शन दिलें कोणें? तें कायदेशीर पद्दतीन दिलां कांय ‘हात ओले आनी बोल्सां गरम’ जाल्यांत, तेंवूय उक्ताडार येवंदी. पालिका, पंचायतींक ह्या अड्ड्यांची खोलायेन म्हायती आसतली. कोलवाळे फाटीं अड्ड्याक उजो लागतकूच गांवांत एकूय कावल अड्डो चलपाक दिवचे नात, अशी भुमिका पंचायत आनी थळाव्या लोकांनी घेतिल्ली. तिचें कितें जालें? कांय अड्ड्यांनी बरोच जागो आडायला, तर कांय अड्डे ल्हान जावन, थंय फास्ट फूड, तांतयां, कोंबयो, नुस्तें विकपी दुकानां सुरू जाल्यांत. निदान तीं तरी कायदेशीर परवानगी घेवन सुरू जाल्यांत आसतलीं, अशी आस्त.
हे कावल अड्डे कोमुनिदादींचे जमनीचेर, भोवतेक लोकवस्तींनी (चडशे रस्त्यां कुशीक) आसात अशें विरोधी पक्ष फुडारी युरी आलेमांव हांणी सांगलें. खरें म्हणल्यार ते लोकवस्ती पसून पयस आसपाक जाय. कोमुनिदादींचे 1990 पयलीं कितले जागे आशिल्ले आनी आयज कितले उरल्यात ताची मेजणी केल्यार बरी. उद्देगीक वसणुको, सरकारी प्रकल्पां खातीर हातूंतले बरेच जागे गेल्यात. थोडे कडेन घरां, काॅलनी उब्यो जाल्यात. ताचे वयल्यान वाद पसून जाल्यात. प्रकरणां न्यायालयांनी पावल्यांत. कोमुनिदादीचे जाळवणदार आसात, ते रोखठोक उलोवपी, फुडारपण करपी. गांव आनी राज्य पांवड्या वयले फुडारी पसून जावपाची तांकां तांक आसा. मागीर कावलां अड्ड्यांनी कोमुनिदाद जमनींचेर अतिक्रमण केलां हें तांकां कशें समजलें ना? काय ते जागे कावल धनयांनी भाड्यान बी घेतल्यात?
कावलां अड्डे धोरणांत ह्या अड्ड्यांचो थळाव्या लोकांक त्रास, मनस्ताप जावचो ना, हे खातीर पावलां उबारचीं पडटलीं. शक्यतो गांवां भायर, जंय लोकवस्ती ना, थंय तांकां जागो दिवचो पडटलो. धोक्याचो थारूं येता असो कोयर, उजो लागूं येता अशा वस्तूंचीं सांठवण आनी येरादारी हाचेर नियंत्रण दवरपाक सरकारी यंत्रणेक दोळ्यांचेर उदक मारून जागी करची पडटली.
सरकारी आंकडेवारी प्रमाण, 380 कावलां अड्डे आसात. जे बेकायदेशीर अड्डे 20 वर्सां सावन आसात, तांकां नोटिसो काडपाचें काम सुरू जालां. आमदार युरी आलेमांव हांच्या मतान, गोंयांत 699 कावलां अड्डे आसात आनी तातूंतले 686 बेकायदेशीर आसात. हें भयंकरूच म्हणचें पडटलें. 13 सोडल्यार सगलेच अड्डे कायदेशीर परवानो घेनासतना उबारल्यात असो हाचो अर्थ जालो ना? इतलें सगलें जायसर सरकारी यंत्रणा ओगी कशी रावली? हे अड्डे 1 लाख 58 हजार चौखण मिटर जमनीचेर आसात. अड्डे बेकायदेशीर म्हणटकूच ती जमिनूय अतिक्रमण केल्ली जाली ना? कावलां अड्ड्यां प्रमाण हेर वेवसायीक, धंदेकारांनीय अशेंच करूंक ना कित्या वयल्यान? सरकारान ताचोय तपास करपाक जाय.
कोयराचो विलो लावपाक कावलां अड्डे जायच, पूण ते लोक म्हणटात, तशे ‘गांवांनी टिकटीकपी टायम बाॅम्ब’ थारचे न्हय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
