भांगरभूंय | प्रतिनिधी
भाजी मार्केटांत गेले उपरांत सगल्यांत पयलीं नदर वता ती तांबड्या गोल, रसरशीत टाॅमेटोचेर. ताची लागवड गोंयांत जायना तरी ते भायल्यान हांगा विकपाक येतात. चडश्या घरांनी ताचो सदांच वापर जाता. प्रत्येक गरम मसाल्याच्या जिनसांत, सुंगटां, तिसऱ्यांच्या कालवणांत सर्रास टाॅमेटो घालतात. ताचो रोस, सार, सालाद. भाजी, केच अप, प्युरी करतात. कांय जाण टाॅमेटोच हालवोय करतात. थोड्यांक सदांच जेवणार टाॅमेटो खावपाची संवय आसता. मागीर ते कितलेय म्हारग जाले तरी ताचो वापर जाता.
उदेंतीच्या सुर्याच्या कंवळ्या किरणांनी व्हिटामीन डी आसता. तशेच टाॅमेटोनूय व्हिटामीन डी आसता. तें आमचे कुडींतलीं हाडां घटमुट करता. आमची रोग प्रतिकार शक्त वाडयता.
तशें पळोवंक गेल्यार टाॅमेटोन कॅलरी, कमी पुश्टीकताय आसता. हातूंत व्हिटामीन सी, फाॅस्फरस, कॅल्शियम, पोटेशियम अशें गरजेचे घटक आसतात. ते व्हडल्या दुयेंसां पसून आमची राखण करता. टाॅमेटोचे खूबशे भलायके खातीर फायदे आसात.
टाॅमेटो चड खावप बरें न्हय. टाॅमेटो आम्लयुक्त आसतात. पोटांत गॅस्ट्रीक अॅसिड तयार जाता. चड प्रमाणांत टाॅमेटो खाल्यार हड्ड्यांत जळजळ जाता. सांदे दुखतात. तातूंतल्या साॅलेनीन घटकाक लागून सांद्यांक सुज येवंक शकता. केन्नाय आंगार पुरळ येता. टाॅमेटोची अॅलर्जी जाता जाल्यार ते चड खावप बरोबर न्हय. चड प्रमाणांत टाॅमेटो खाल्यार चॅरो आनी जिबेक सुज येता.थोड्यांक ताची अॅलर्जी आसता. तांकां तो हातांत घेतल्यार पसून कातीचेर सुज येता. जळजळ जाता.
टाॅमेटो कुडी खातीर बरो. पूण तो चड खावपाक जायना. ताचे पसून तयार केल्ले कसलेय पदार्थ जर पचना, ताचे पसून कितें जाता जाल्यार दोतोरांचो सल्लो घेतिल्लो बरो.
– सिद्धी तिळवे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
