भांगरभूंय | प्रतिनिधी
पणजीः परदेशांत जावपी रोड शो आनी इव्हेंटा वेल्यान विरोधी पक्ष फुडारी आनी पर्यटन मंत्री रोहन खंवटे हांचे मदीं बरेंच पेटलें. पर्यटन खात्यान लंडन सारिकिल्ल्या शारांनी वचून गोंय पर्यटनाचे प्रोत्साहनाचेर भरपूर खर्च केला. मात प्रत्यक्षांत ज्या देशांनी हे रोडशो जाल्यात त्या देशातले कितले पर्यटक गोंयां आयल्यात हाचो कसलोच डेटा ना. हे विशीं जाप दितना पर्यटन मंत्री रोहन खंवटे हांणी सांगलें, हे खातीर टायम सोफ्टेवअर तयार केला आनी रोखडेंच हे विशीचो आंकडो दितले.
विधानसभेंत गोंयांक भेट दिवपी पर्यटकांचो आंकडो दीत चल्ला असो दावो सत्ताधारी आनी विरोधकांनी प्रस्नोत्तर वरा वेळार केलो.
हे विशीं उलयतना विरोधी पक्ष फुडारी युरी आलेमाव हांणी सांगलें, पर्यटन खात्यान परदेशांत कोट्यांनी रुपया खर्च करून रोड शो आनी इव्हेंट घेडोवन हाडल्यात. मात हे कार्यावळींक लागून ह्या देशांतल्यान कितले पर्यटक गोंयां आयल्यात ताचो कसलोच डॅटा ना.
पर्यटन खात्यान लंडनच्या शारांत भरपूर रोड शो केल्यात. मात हे इव्हेंटा उपरांत युके सावन नेमके कितले पर्यटक आयल्यात हाची म्हायती पर्यटन खात्यान दिवंक ना. मंत्र्यान विदेशी नागरीक नोंदणीचे प्रादेशीक कार्यालया (एफआरआरओ) कडल्यान डेटा घेवपा फाटी फुडें कित्याक जाता, असो प्रस्न आलेमांव हांणी केलो.
हे विशीं जाप दितना पयलीं केंद्राकडल्यान दर देशांतल्या येवपी पर्यटकांचो आंकडो येतालो. तो आतां बंद जाला आनी सगळ्या देशांचे डॅटा एकठांय करून धाडटा.
हे रोड शो लागून नवे देश आतां गोंयां येवपाक लागल्यात. उजबेकीस्तान आनी पोलंड हे सारकिल्ल्या देशांतल्यान चार्टड विमाना सुरू जाल्यांत. रशियेची पेगसस चार्टड परत सुरू जाल्यांत. हें सगलें इव्हेंट आनी रोडशोंक लागून जालां. ह्या विदेशी नागरीकांचो डेटा दिवचो म्हण आमी एफआरआरओक पत्र बरयलां, अशें खंवटे हांणी सांगलें.
मात लेखी प्रस्नांत एफआरआरओ आनी गृह खात्याक कसलेंच पत्र बरोवंक ना असो आरोप युरी आलेमाव हांणी केले उपरांत पर्यटन मंत्री आनी विरोधी पक्ष फुडार्यां मदीं पेटलें.
बोवळा उपरांत मंत्री खंवटे हांणी सांगलें, तांणी टायम मोड्यूल सोफ्टवेअर हॉटेलांनी सुरू केलां. जे विदेशी पर्यटक येतात तांची नोंद हे सोफ्टवेअराचेर जातली. खंयचो विदेशी पर्यटक खंयच्या देशांतल्यान आयला हाचो आंकडो टायम सोफ्टवेअरा वरवीं दितले, अशी म्हायती खंवटे हांणी दिली.
गोंयांत पर्यटकांचो आंकडो देंवत चल्ला आनी पर्यटन मंत्र्यान चुकीचो आंकडो दाखयला, असो आरोप कळंगुटेचे आमदार मायकल लोबो हांणी केलो.
कोविडा उपरांत लंडन, पोर्तुगाल सावन खुबशे ओसीआय गोंयकार परत घरा आयल्यात. तांची नोंद पर्यटन खात्यान पर्यटक म्हण केल्या. लंडन ते गॅटवीक ह्या विमानांत ९० टक्के गोंयकार आसात. तांका मेजून पर्यटकांचो आंकडो वाडला अशें दाखयलां, अशें लोबो हांणी म्हणलें. हाचेर जाप दितना गोंयकारांनी गोंयांत पर्यटन कमी जायत चल्ला. हो दृष्टीकोण भायरावपाचो उलो मारलो.
जानेवारी आनी जुन मजगतीं ५७.१२ लाख पर्यटकांची राज्यांत नोंद जाली. तांतुतले ३४.६४ लाख देशी पर्यटक दाबोळी विमानतळाचेर जाल्यार २२.४८ लाख देशी पर्यटक मोपा विमानतळाचेर देवलें. हातूंत ३.२५ लाख विदेशी पर्यटकांचो आसपाव आसा. तातुंतले १.१५ लाख दाबोळी विमानतळाचेर आनी २.१० लाख पर्यटक देवलें. जाल्यार ह्या वर्सा हॉटेलां ७०% ते १००% फुल्ल आसली, अशी म्हायती खंवटे हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
