भांगरभूंय | प्रतिनिधी
अरुण जेटली स्टेडियमाचेर जाल्ले वादग्रस्त मॅचींत बांगलादेशान श्रीलंका पंगडाक 3 विकेटींनी हारयलो. पयलीं बॅटींग करपी श्रीलंकेची सुरवात बाबत जाली. पूण, चरिथ असलांकाचो (108) शेंकडो, पथुम निसांका आनी सदीरा समरविक्रमा हांच्या दरेकी 41 धांवड्यांक लागून श्रीलंकेक 279 मेरेन मारप शक्य जालें. मोखीचो फाटलाव करपी बांगलादेशाक नतमूल शान्तोची (92) आनी शाकिब अल हसन (82) हांची मजत मेळ्ळी. तशेंच सकयले सुवाते वयल्या बॅट्समनांनी म्हत्वाच्यो धांवड्यो करून पंगडाचें जैत निश्चीत केलें. बांगलादेशाचें आव्हान पयलींच सोंपला.
श्रीलंकेचे हारींत टायआवटाची व्हड भुमिका थारली. अॅंजेलो मॅथ्यूज बॅटींग करपाक खेळपट्टीचेर पावलो, त्या वेळार हॅल्मेटाचो स्ट्रॅप तुटिल्लो ताका दिसलो. ताणें तंबूंतल्यान दुसरें हॅल्मेट मागयलें. ते मेरेन तीन मिनटां जावन गेल्ली. बांगलादेशाचो मुखेली शाकिब अल हसनान टायम आवटाचें अपील केलें. अंपायरान नेमा प्रमाण बाद दिलो. हे घडणुके उपरांत श्रीलंकेक स्वताक सांबाळपाक जमलें ना. उपरांत ताचे बॉलर लयेंत दिसूंक ना. मॅची वेळार दोनूय पंगडां मदीं दोन खेपे लटाफट जावपाची स्थिती उप्राशिल्ली. पूण, टायम आवट प्रकरणा उपरांत श्रीलंकेचो मार्ग भरकटलो आनी शाकिब आनी शांन्तो हाचो फायदो घेत आपल्या पंगडाक जैत मेळोवन दिलें.
ते पयलीं चरिथाच्या शेंकड्याक लागून श्रीलंकेक तिनशेंच्या लागसार धांवड्यो करप शक्य जाल्यो. ताणें 105 बॉलांनी पांच सके आनी स चवक्यांचे मजतीन 108 धांवड्यो केल्यो. ताका धनंजय डिसिल्वाची (34) बरी साथ मेळ्ळी. दोगांयनी सवे विकेटी खातीर 78 धांवड्यांची भागिदारी केली.
अॅंजेलो मॅथ्यूजाचे विकेटी वयल्यान वाद
श्रीलंकेचो आदलो मुखेली आनी अणभवी अश्टतासांचो खेळगडो अॅंजेलो मॅथ्यूज ‘टायम आवट’ जालो. आंतरराष्ट्रीय क्रिकेटींत टायम आवट जावपी मॅथ्यूज संवसारांतलो पयलो बॅट्समन थारलो. समरविक्रमा बाद जाल्या उपरांत निर्धारीत वेळांत मॅथ्यूज पयलो बॉल खेळूंक ना.
नेमा प्रमाण, दोन मिनटां खेळपट्टीर येवपाक जाय आशिल्लो आनी तीन मिनटां भितर खेळपाक जाय आशिल्लो. पूण, हॅल्मेट घालपाच्या नादांत तो तीन मिनटांत खेळपाक शकलो ना. ताका लागून शाकिब अल हसनान टायम आवटाचें अपील केलें आनी अंपायरान नेमा प्रमाण ताका बाद दिलो.
श्रीलंका क्रिकेट मंडळ बरकास्त
संवसारीक वन डे क्रिकेट सर्तींत निर्शेण हाडपी प्रदर्शन केल्ल्यान श्रीलंका देशाचो खेळां मंत्रालयान श्रीलंका क्रिकेट मंडळ बरखास्त केलें. ते उपरांत खेळां मंत्री रोशन रणसिंघेन 1996ची संवसारीक सर्त जिखपी श्रीलंकेच्या पंगडाचो मुखेली अर्जुन रणतुंगाक नवो अंतरीम मंडळाचो अध्यक्ष केला.
श्रीलंका क्रिकेट मंडळाचेर भ्रश्टाचाराचे लेगीत आरोप जाल्यात. भारता आड लजेक घालपी हार घेवची पडल्या उपरांत रोशन रणसिंघेन श्रीलंका क्रिकेट मंडळाक देशद्रोही आनी भ्रश्ट लेगीत म्हणिल्लें. ताणें मंडळाच्या वांगड्यांक राजिनामो दिवपाक सांगिल्लो. ते उपरांत सचीव मोहन डी सिल्वान आपल्या पदाचो राजिनामो दिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
