भांगरभूंय | प्रतिनिधी
पांचूय पर्यटकांक मरण, आयतारची घडणूक
न्यूयाॅर्क : अटलांटिक म्हासागरांत 111 वर्सां आदीं बुडिल्ल्या टायटॅनिक बोटीचे अवशेश पळोवपाक गेल्ल्या पाणबुडयेंतल्या सगळ्या पाचूंय जाणांक मरण आयलां. टायटन भोंवडेचें फुडारपण करपी कंपनीन बेपत्ता जाल्ले पांचूय जाण मेल्यात, अशें सांगलां. पाणबुडयेचे भायले कवच आनी हेर कांय अवशेश मेळ्ळ्यात. खोस समुद्रांत उदकाच्या दाबाक लागून ३० सेकंदा भितर ही पाणबुडी स्फोट जावन फुटली, असो अदमास जाणकारांनी उक्तायला.
पायलट आनी मुखेल कार्यकारी अधिकारी (सीईओ) स्टॉकटन रश, प्रवासी शाहजादा दाऊद आनी ताचो पूत सुलेमान दाऊद, हमीश हार्डिंग आनी पॉल हेन्री नार्गोलेट हांकां आमी वगडायल्यात, अशें ओशनगेट एक्सपीडिएशनान सांगलें. आयतारा ही पाणबुडी बेपत्ता जाली. तातूंत फकत ९६ वरां म्हळ्यार चार दिसांचो ऑक्सिजनाचो सांठो आशिल्लो.
सोद कार्य वाठारांत कुडके मेळ्ळ्यात, अशें अमेरिकेच्या दर्यादेग राखण दळान स्पश्ट केलां. टायटॅनिक बोटीच्या सुवातेर रिमोट कंट्रोलान चलपी आनी उदका पोंदा सोद घेवपी वाहनांन हे पाणबुडयेचे कुडके सोदल्यात.
टायटॅनीक तारवाच्या भग्नावशेशाची ‘पाणबुडी भोंवडी’ ओशनगेट एक्सपीडिशन्स कंपनीन चालू केल्या. टायटॅनिक अवशेश पळोवपाक व्हड प्रमाणांत पर्यटक वतात. कॅनडांतल्या न्यूफाउंडलॅण्डांतल्या उत्तर अटलांटिकाच्या तळाक आशिल्ले हे अवशेश पळोवपाची जायत्या जाणांक उमेद आसा. टायटॅनिक तारवाचे अवशेश ३८०० मीटर खोलायेचेर आसात. हाचे खातीर दरेका पर्यटकाक भारतीय चलनांत 2 कोटी रुपया फारीक करचे पडटात.
टायटॅनिक बोट 15 एप्रिल 1912 दिसा बुडिल्ली. 1500 लोकांक मरण आयलें. हिमखंडाक धपको बसतकच बोटीक बुराक पडून उदक घुशिल्लें आनी कांय वरांनी दोन कुडके जावन ती बुडिल्ली. हाचेर कांय वर्सां पयलीं सिनेमा आयिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
