भांगरभूंय | प्रतिनिधी
मुंबयः भारतीय समाजाच्या परंपरीक नदरेक आव्हान दिवन टाटा ट्रस्टान मासीक पाळी विशीं समाजाची धारणा बदलपा खातीर धाडसी जागृताय मोहीम सुरू केल्या. भारतांत दर म्हयन्याक सुमार ३५.५ कोटी लोकांक मासीक पाळी येता, पूण अजूनय ती लज येवपा सारकी, अशुद्ध गजाल मानतात. तशेंच हे विशीं जायत्यो चुकीच्यो कल्पना अजूनय तश्योच तिगून आसात. चड करून मासीक पाळी येवप हें फकत लैंगीक परिपक्वतायेचें वा लग्नाचे तयारीचें लक्षण अशें लोक मानतात. ७१% चलयांक पयलेच खेपे मासीक पाळी येता तेन्नाच हे विशीं म्हायती मेळटा. देखून टाटा ट्रस्ट लोकांक मासीक पाळी ही भलायकेचें लक्षण अशें समजावपाचो यत्न करता.
ही मोहीम झारखंड, उत्तर प्रदेश आनी गुजरात ह्या राज्यांच्या गांवगिर्या वाठारांनी खोलायेन सांस्कृतीक आनी समाजीक अभ्यासाचेर निंबून चालीक लायल्या. तातूंत जायत्या बायलांक आनी तरणाट्या चलयांक नितळसाण, गुप्तताय आनी मासीक पाळी वेवस्थापनांत आडमेळीं येतात तें सांगतात. तांच्या जिवितांतले जायते निर्बंध समाजीक नेमाचो परिणाम आसात.
चडशीं आवय आपल्या चलयां कडेन मासीक पाळी विशीं उलयनात, कारण समाज मासीक पाळी हें चली ‘लग्नाक तयार’ आसा हाची लक्षण म्हणून पळयतात. आंगणवाडी सेविकाय हो भंय उक्तायतात. दादल्यांक मासीक पाळी विशीं उणी म्हायती आसली तरी योग्य म्हायती मेळ्ळ्यार पॅड हाडप वा दोतोरा कडेन व्हरप अशा गजालींनी ते चड मदत करपाक तयार आसतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
