भांगरभूंय | प्रतिनिधी
मुंबय, खबरां संस्था: उद्देगपती रतन टाटाच्या मरणा उपरांत आतां टाटा ट्रस्ट कोण सांबाळटलो, असो प्रस्न जायत्या जाणांक पडिल्लो. ह्या प्रस्नाची जाप आतां मेळ्ळ्या. रतन टाटाचो सावत्र भाव नोएल टाटा हांची आतां टाटा ट्रस्टाचे अध्यक्ष म्हणून नेमणूक जाल्या. रतन टाटाच्या मरणा उपरांत हालींच मुंबयंत टाटा पंगडाची म्हत्वाची बसका जाली. हे बसकेंत रतन टाटाचो भाव नोएल टाटा हांची सगळ्या वरिश्ठ अधिकार्यांच्या आनी विश्वस्तांच्या संमतीन टाटा ट्रस्टाचे नवे अध्यक्ष म्हणून नेमणूक करपाचें थारायलें.
टाटा समुहाच्या दोन सगळ्यांत व्हड धर्मादाय संस्था सर रतन टाटा ट्रस्ट आनी सर दोराबजी टाटा ट्रस्ट हांच्या मुखेल पदाचेर आतां नोएल टाटांची नियुक्ती केल्या. नोएल टाटा पयलीं ह्या दोनूय संस्थांचे ट्रस्टी म्हणून काम करताले. आतां ते ह्या संस्थांचे वेव्हार पळयतले. ह्यान पयलीं हें रतन टाटाच सांबाळटाले. ही संस्था स्थापन करपाक रतन टाटान स्वता म्हत्वाचो वांटो घेतिल्लो. टाटा समुहाची होल्डिंग कंपनी टाटा सन्सांत टाटा ट्रस्टाची व्हड भागिदारी आसा. टाटा ट्रस्टाचो टाटा सन्सांत ६६ टक्के वांटो आसा. टाटा समूह टाटा ट्रस्ट चलयता. टाटा ट्रस्ट धर्मार्थ कार्यावळी आनी प्रशासनाचेर देखरेख दवरता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
