टमाट पावलो पन्नासाचेर

भांगरभूंय | प्रतिनिधी

कांदे, बटाट्यां सयत शाकभाजयोय म्हारग

भांगरभूंय । प्रतिनिधी

पणजी : पावसाक लागून कर्नाटक आनी महाराष्ट्रांतल्यान येवपी आवक उणी जाल्ल्यान पणजी बाजारांत भाजयांचे दर वाडले. सोमारा पणजी बाजारांत टमाट 50 रुपया कील जाल्ले. फाटल्या सप्तकांत ते 40 रुपया कील मेळटाले. कांदो 5 रुपयांनी म्हारग जावन 35 रुपया कील जाला. बटाटे 5 रुपयांनी वाडून 45 रुपया कील जाल्यात. कोथमिरीची व्हडली जुडी 40 रुपयांक मेळटली. शाकभाजयांचे लेगीत दर वाडल्यात.

सोमारा पणजी बाजारांत मेथी 40 रुपया, शेपू 30 रुपया जाल्यार पालक, तांबडी भाजयेची एक जुडी 20 रुपया आशिल्ली. मॉन्सून बेगीन आयिल्ल्यान महाराष्ट्र, कर्नाटकांतल्या टमाट, कांद्यां सयत हेर पिकांक मार बसला. पावसाच्या दिसांनी ह्या उत्पादनांची येरादारी लेगीत सावकासायेन जाता. हाका लागून हो म्हाल गोंयांत पावता म्हणल्यार पेड्डेर जाता. हाका लागून लेगीत दर वाडल्यात. फुडल्या कांय दिसांनी टमाट आनी कांदे आनीक म्हारग जावपाची शक्यताय वेपाऱ्यांनी उक्तायल्या.

बाजारांत वालपापडी दर्ज्या प्रमाण 180 ते 200 रुपया कील आसली. चिटकी 40 रुपयांनी वाडून 120 रुपया कील जाल्यार ढब्बू मिरसांग 20 रुपयांनी वाडून 120 रुपया कील जाल्ली. मिरसांग 100 रुपया, म्हस्काच्यो सांगो 160 रुपया कील आसल्यो. फ्लावर 50 रुपयांक जाल्यार कोबी 40 रुपयांक एक गड्डो मेळटालो. ल्हान वायंगी 60 रुपया, व्हडलीं वायंगी 80 रुपया, गाजर, कारातीं आनी बीट 80 रुपया, घोसाळीं 80 ते 100 रुपया जाल्यार भेंडे 80 रुपया कील आशिल्ले.

बाजारांत रानमेव्याची आवक उणी जाल्या. सोमारा बाजारांत काजीच्यो बियो 300 रुपयांक 100 नग मेळटाले. मांगीलाल 600 रुपयांक जाल्यार हापूस आंबो 300 ते 400 रुपया डझन आशिल्ले. सोमारा फलोत्पादन मंडळाच्या गाड्यांचेर भेंडे 54 रुपया कील, कोबी 29 रुपया, फ्लावर 35 रुपयांक एक नग, गाजर 46 रुपया, वालपापडी 137 रुपया, मिरसांग 54 रुपया, कांदो 26 रुपया जाल्यार टमाट 36 रुपया कील विकताले.