भांगरभूंय | प्रतिनिधी
पणजीः महाराष्ट्र आनी कर्नाटका सयत देशभर पडिल्ल्या पावसाक लागून भाजयांचे दर वाडल्यात. देशभरांत कांय दिसां आदींच टमाटान शेंकडो हुपिल्लो. शेनवारा पणजी बाजारांत टमाटां 90 ते 95 रुपया कील आशिल्लीं. पावसाचो नेट असोच उरलो जाल्यार हेर राज्यांतल्यान येवपी भाजयांचें प्रमाण उणें जावपाची शक्यताय आसा. ताका लागून टमाटां सयत हेर भाजयांचे दर आनीक वाडपाची शक्यताय वेपाऱ्यांनी उक्तायल्या.
शेनवारा पणजी बाजारांत शेंगो आनी मटार दरेकी 200 रुपया कील ह्या दरान विकताले. मिरसांग परतून वाडून 120 रुपया कील जाली. जाल्यार वांयगीं 20 रुपया वयल्यान 80 रुपया कील जालीं. फाटल्या सप्तकाचे तुळेंत हेर भाजयांचे दर स्थीर आशिल्ले.
बाजारांत बटाट आनी कांदो दरेकी 50 रुपया कील, ढब्बी मिरसांग 120 रुपया कील, तवशीं आनी गाजर दरेकी 60 रुपया कील, वालपापडी 160 रुपया कील, भेंडो आनी कारोतीं दरेकी 80 रुपया कील आशिल्लीं.
शाक भाजयांचे दर स्थीर आशिल्ले. मेथी 30 रुपया, शेपू 25 रुपया, तांबडी भाजी 15 रुपया आनी कांद्याची पात 10 रुपया एक जुडी ह्या दरान विकताले. आलें 200 रुपया आनी लसूण 320 रुपया कील आशिल्ली. शेनवारा फलोत्पादन मंडळाच्या गाड्यांचेर बटाट 40 रुपया, कांदो 40 रुपया, टमाट 78 रुपया, वालपापडी 56 रुपया, मिरसांग 65 रुपया, भेंडो 42 रुपया, गाजर 42 रुपया जाल्यार कोबी 39 रुपया कील ह्या दरान विकताले. फ्लावराचो एक नग 36 रुपया आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
