टपाल तिकेट हो देशाचो ल्हानसो राजदूत

भांगरभूंय | प्रतिनिधी

श्रीपाद नायक : गोवापेक्स प्रदर्शनांत गोंयचे 1 हजार विद्यार्थी वांटेकार

भांगरभूंय । खबरां मेज

पणजी : एकादे टपाल तिकेट हो देशाचो ल्हानसो राजदूत आसता. तो देशाचो इतिहास सांगता, संस्कृती सांबाळटा, सैमाची सुंदरताय उक्तायता आनी एका समाजाची वळख फुडले पिळगे मेरेन पावयता. फिलाटेली हो छंद नासून संस्कृती सांबाळपाचो शांत पूण बळिश्ट मार्ग आसा, अशें केंद्रीय मंत्री श्रीपाद नायक हांणी सांगलें.

पणजेच्या इन्स्टिट्यूट मिनेझीस ब्रागांझा सभाघरांत गोंय पोस्ट विभागा वतीन जिल्हो (उत्तर आनी दक्षीण) पांवड्या वयल्या गोवापेक्स 2025 फिलाटेली प्रदर्शनाच्या समारोप सुवाळ्यांत मुखेल सोयरे म्हूण मंत्री नायक उलयताले.

ह्या वेळार माचयेर महाराष्ट्र आनी गोंयचे मुखेल पोस्टमास्टार जनरल अमिताब सिंग (आयपीओस), गोंय विभागाचे सिनियर सुप्रिटेंडन्ट ऑफ पोस्ट ऑफिसीस अनुराग निखारे (आयपीओएस), गोंय विभागाचे डायरेक्टर, पोस्टल सर्विसेस रमेश पाटील (आयपीओएस) हाजीर आशिल्ले.

पुर्तुगीज राजवटींतल्या तिकिटां पासून ते आधुनीक चित्रांकीत रद्दचिन्नां मेरेन, गोंय भारतीय फिलाटेलीक इतिहासाच्या दरेका पांवड्यार नेटान पर्जळीत आयला. बेबिंका, कुणबी साडी, खोला मिरसांग, मंडोळी केली ही आंतरराष्ट्रीय वळख मेळिल्लीं उत्पादना आयज संवसारभरांत पावल्यात, ती तिकिटांच्या माध्यमांतल्यान, अशें मंत्री नायक हांणी सांगलें.

पोस्टल विभागाचें कवतूक करतना नायक हांणी म्हणलें, तुमचें काम फक्त तिकेटी प्रकाशीत करपाचें ना, जाल्यार तुमी देशाचो इतिबास सांबाळटात, संस्कृती फुडें व्हरतात नी समाजाक शिक्षणीक दिशा दितात. ही सेवा मोलादीक आसा.

अंदूं गोवापेक्साच्या विवीध सर्तींनी, कार्यशाळांनी, हेरिटेज टॉकांत गोंयांतल्या 35 शाळांतल्यान सुमार एक हजार विद्यार्थी वांटेकार जाल्ले. ह्या वेळार विवीध टपाल तिकेटींचें आनी कवरांचें लोकार्पण केलें. तशेंच गोवापेक्स 2025 जिल्हो पांवड्या वयल्या फिलाटेलीक प्रदर्शनाचें पुरस्कार मुखेल सोयऱ्यां हस्तुकीं भेटयले. ह्या वेळार अमिताब सिंग हांचेंय उलोवप जालें. अनुराग निखारे हांणी येवकार दिलो, आर. पी. पाटील हांणी उपकार मानले.